ខេត្តភាគកណ្ដាល វៀតណាម ជួបគ្រោះរញ្ជួយដីមួយភ្លែត ៧ លើកជាប់គ្នា

វិទ្យាស្ថានភូគព្ភសាស្ត្របាននិយាយថា ការរញ្ជួយដីចំនួន ៧ លើកដែលមានកម្រិតរហូតដល់ ៤.១ រ៉ិចទ័របានវាយប្រហារស្រុក Kon Plong ខេត្ត Kon Tum ដែលមានទីតាំងនៅតំបន់ខ្ពង់រាបភាគកណ្តាលរបស់ប្រទេសវៀតណាមកាលពីថ្ងៃព្រហស្បតិ៍ ។

ការរញ្ជួយដីលើកទីមួយមានកម្រិត ២.៧ រ៉ិចទ័របានវាយប្រហារនៅម៉ោង ៩ និង ១៣ ព្រឹក និងចុងក្រោយមានកម្រិត ៣.៤ រ៉ិចទ័រកើតឡើងនៅម៉ោង ៦ និង ៣៦ នាទីល្ងាច ។ ចំណែកការរញ្ជួយដីខ្លាំងបំផុតដែលមានកម្រិតរហូតដល់ ៤.១ រ៉ិចទ័រត្រូវបានកត់ត្រានៅម៉ោង ១ និង ៣៩ នាទីរសៀល ។

វិទ្យាស្ថានភូគព្ភសាស្ត្របាននិយាយទៀតថា ការរញ្ជួយដីមិនបង្កហានិភ័យគ្រោះមហន្តរាយណាមួយឡើយ ប៉ុន្តែប្រជាពលរដ្ឋមានការភ័យស្លន់ស្លោរ ដោយសារតែវាកើតឡើងមួយភ្លេត ៧ លើក ហើយនៅពេលនេះអាជ្ញាធរក៏កំពុងបន្តសង្កេតមើលការវិវត្តដែលពាក់ព័ន្ធ ។

កាលពីពេលថ្មីៗនេះស្រុក Kon Plong ក៏បានរងគ្រោះដោយការរញ្ជួយដីប្រមាណជា ១២ លើកផងដែរ ដែលមានកម្រិតពី ២.៥ ទៅ ៤.៤ រ៉ិចទ័រ វាយប្រហារតំបន់នេះកាលពីថ្ងៃទី ២៣ និង ២៤ ខែសីហាកន្លងទៅ ខណៈការរញ្ជួយដីកម្រិត ៤.៧ រ៉ិចទ័រ គឺជាកម្លាំងខ្លាំងបំផុតដែលបានវាយលុកស្រុក Kon Plong ក្នុងរយៈពេលជាច្រើនឆ្នាំមកនេះ ។

ទន្ទឹមនោះ អាជ្ញាធរ​មូលដ្ឋាន​ក៏បាន​ចេញ​ការ​ព្រមាន និង​ការ​ណែនាំ​ដល់​ប្រជាពលរដ្ឋ​ឲ្យមានការប្រុងប្រយ័ត្ន ក៏ដូចជាអំពី​របៀប​ឆ្លើយ​តប​ផល​វិបាក​ដែល​អាច​កើត​ឡើង​ពី​ការ​រញ្ជួយ​ដី​នៅ​ក្នុង​តំបន់ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ ថៃ ឲ្យពលរដ្ឋរស់នៅតាមបណ្ដោយទន្លេមេគង្គប្រុងប្រយ័ត្ន កម្ពស់ទឹកកំពុងហក់ឡើងខ្លាំង