លោក Zelensky និយាយ​ថា អ៊ុយក្រែន ដណ្តើមយក​បានទឹកដីមកវិញ នៅ​ភាគ​ខាង​ត្បូង និង​ខាង​កើត (មានវីដេអូ)

ប្រធានាធិបតីអ៊ុយក្រែនលោក Volodymyr Zelensky កាលពីថ្ងៃអាទិត្យទី០៤ខែកញ្ញា បានថ្លែងអំណរគុណដល់កងកម្លាំងរបស់លោក សម្រាប់ការដណ្តើមយកបានមកវិញនូវតំបន់ចំនួនពីរនៅភាគខាងត្បូង ក៏ដូចជាទឹកដីបន្ថែមនៅភាគខាងកើតប្រទេសផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ លោកមិនបានបញ្ជាក់ជាក់លាក់ទេអំពីទឹកដីទាំងនោះ ហើយក៏មិនបានអះអាងអំពីពេលវេលាដែរ ប៉ុន្តែនិយាយថា លោកទទួលបានរបាយការណ៍ល្អ ពីមេបញ្ជាការយោធា និងជាប្រធានផ្នែកចារកម្មរបស់លោក នៅក្នុងកិច្ចប្រជុំកាលពីថ្ងៃអាទិត្យ។

នៅក្នុងសុន្ទរកថាវីដេអូពេលយប់ លោក Zelensky បានថ្លែងអំណរគុណដល់កងកម្លាំងរបស់លោកសម្រាប់ការរំដោះទឹកដីនៅក្នុងតំបន់ Donetsk ភាគខាងកើត, ការដណ្តើមយកតំបន់នៅភាគខាងកើត Lysychansk-Siversk និងសម្រាប់ការរំដោះទឹកដីភាគខាងត្បូងចំនួនពីរកន្លែង។

លោក Kyrylo Tymoshenko អនុប្រធានការិយាល័យប្រធានាធិបតី បានបង្ហោះរូបភាពទាហានលើកទង់ជាតិអ៊ុយក្រែនលើភូមិមួយ ដែលលោកកត់សម្គាល់ថា ស្ថិតនៅក្នុងតំបន់ភាគខាងត្បូង ដែលជាចំណុចសំខាន់នៃការប្រយុទ្ធវាយបក។

លោក Tymoshenko បានបង្ហោះ Facebook ថា “Vysokopillya, តំបន់ Kherson, អ៊ុយក្រែន, ថ្ងៃនេះ”។

ស្ថិតនៅភាគខាងជើងនៃឧបទ្វីប គ្រីមៀ, តំបន់ Kherson ត្រូវបានដណ្តើមយកដោយកងកម្លាំងរុស្ស៊ី នៅដើមដំបូងនៃជម្លោះដែលចាប់ផ្តើមកាលពីខែកុម្ភៈ។

ទឹកដី Lysychansk ត្រូវបានដណ្តើមយកដោយក្រុមបំបែកខ្លួនគាំទ្ររុស្ស៊ីនៅក្នុងតំបន់ Luhansk កាលពីដើមខែកក្កដា ដែលជាផ្នែកមួយនៃការប្រយុទ្ធគ្នាជុំវិញតំបន់ Donbas ភាគខាងកើតប្រទេសអ៊ុយក្រែន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Reuters

ចុចអាន៖ លោក Zelensky ប្រាប់ឲ្យកងទ័ពរុស្ស៊ី វិលត្រលប់ទៅផ្ទះវិញ បើចង់រស់