លោក ត្រាំ ហៅ បៃដិន ថាជា “សត្រូវរបស់ប្រទេស” ក្នុងជម្លោះនយោបាយថ្មី

អតីតប្រធានាធិបតីអាមេរិកលោក ដូណាល់ ត្រាំ បានហៅចំៗទៅលោក ចូ បៃដិន អ្នកស្នងតំណែងរបស់លោកថាជា “សត្រូវរបស់ប្រទេស” ។

លោក ត្រាំ បាននិយាយនៅឯការជួបជុំមួយក្នុងរដ្ឋ Pennsylvania ថា “លោក បៃដិន បានថ្លែងសុន្ទរកថាដ៏សាហាវ ស្អប់ខ្ពើម និងបំបែកបំបាក់បំផុតដែលមិនធ្លាប់មានពីមុនមកក្នុងចំណោមប្រធានាធិបតីអាមេរិក” ។

អតីតប្រធានាធិបតីរូបនេះបញ្ជាក់ថា “លោក បៃដិន ជាសត្រូវរបស់ប្រទេស ។ តើអ្នកចង់ដឹងការពិតទេ សត្រូវរបស់ប្រទេសយើងគឺគាត់ និងក្រុមដែលគាត់គ្រប់គ្រង” ។

ការកត់សម្គាល់របស់លោក ដូណាល់ ត្រាំ បានធ្វើឡើងជាការឆ្លើយតបទៅនឹងសុន្ទរកថាថ្នាក់ជាតិរបស់លោក ចូ បៃដិន កាលពីថ្ងៃព្រហស្បតិ៍ពីទីក្រុង Philadelphia ជាកន្លែងដែលប្រធានាធិបតីបច្ចុប្បន្នបានវាយប្រហារលោក ត្រាំ និងអ្នកគាំទ្រដ៏ស្មោះត្រង់របស់គាត់ ឬអ្នកគាំទ្ររបៀបវារៈ Make America Great Again (MAGA) របស់គណបក្សសាធារណរដ្ឋ ។

ក្នុងសុន្ទរកថានោះ លោក បៃដិន បានចោទប្រកាន់លោក ត្រាំ និងក្រុម MAGA មកពីគណបក្សសាធារណរដ្ឋថាជាពួកជ្រុលនិយម និងបង្កការគំរាមកំហែងដល់ “មូលដ្ឋានគ្រឹះ” របស់សហរដ្ឋអាមេរិក ក្រោយការវាយលុកចូលវិមាន Capitol កាលពីឆ្នាំមុន ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អាមេរិក បង្កើនល្បឿនលក់អាវុធឲ្យសម្ព័ន្ធមិត្ត ព្រោះខ្លាចចាញ់ ចិន និងរុស្ស៊ី