វិមានក្រឹមឡាំង បញ្ជាក់ពេលវេលាដែលលោក ពូទីន ចុះទៅតំបន់ Donbass

អ្នកនាំពាក្យវិមានក្រឹមឡាំងលោក Dmitry Peskov បានប្រាប់អ្នកសារព័ត៌មាននៅខាងក្រៅវេទិកាសេដ្ឋកិច្ចបូព៌ាលើកទី ៧ នៅទីក្រុង Vladivostok ថា ប្រធានាធិបតីរុស្ស៊ីលោក វ្ល៉ាឌីមៀរ ពូទីន នឹងចុះទៅតំបន់ Donbass នៅពេលដែលពេលវេលាល្អណាមួយមកដល់ ។

លោក ពូទីន បាននិយាយថា លោកបានអនុញ្ញាតឲ្យចាប់ផ្តើមប្រតិបត្តិការយោធាពិសេសនៅក្នុងប្រទេសអ៊ុយក្រែនដើម្បីការពារប្រជាជនតំបន់ Donbass ដែលកំពុងប្រឈមមុខនឹងការប្រល័យពូជសាសន៍ដែលប្រព្រឹត្តដោយទីក្រុងកៀវអស់រយៈពេល ៨ ឆ្នាំមកហើយ ។ ប្រតិបត្តិការ​នេះ​បាន​ចាប់​ផ្តើម ​បន្ទាប់​ពីទី​ក្រុង​កៀវ​បរាជ័យ​ក្នុង​ការ​អនុវត្ត​កិច្ច​ព្រម​ព្រៀងទីក្រុង Minsk ដើម្បី​បញ្ចប់​សង្គ្រាម​រយៈ​ពេល ៨ ​ឆ្នាំ ។

លោក ពូទីន បាននិយាយកាលពីសប្ដាហ៍មុនថា “ប្រជាជននៃសាធារណរដ្ឋប្រជាមានិត Donetsk, Lugansk និងតំបន់ Crimea មិនចង់ទទួលយកលទ្ធផលនៃរដ្ឋប្រហារឆ្នាំ ២០១៤ របស់ទីក្រុងកៀវនោះទេ បន្ទាប់សង្រ្គាមមួយត្រូវបានចាប់ផ្តើមប្រឆាំងនឹងពួកគេ ហើយបានបន្តអស់រយៈពេល ៨ ឆ្នាំ” ។

លោក ពូទីន បញ្ជាក់ថា “ភារកិច្ច ក៏ដូចជាបេសកកម្មរបស់កងទ័ពយើង និងកងជីវពល Donbass គឺដើម្បីបញ្ចប់សង្រ្គាមនេះ ជាពិសេសសំដៅការពារប្រជាជន ការពារប្រទេសរុស្ស៊ីខ្លួនឯង ពីព្រោះបច្ចុប្បន្ននេះក្រុមប្រឆាំងរុស្ស៊ីបានចាប់ផ្តើមបង្កើតឡើងនៅលើទឹកដីអ៊ុយក្រែន ដែលគំរាមកំហែងដល់ប្រទេសរបស់យើង ដូច្នេះហើយទើបវីរបុរសរបស់រុស្ស៊ីកំពុងប្រយុទ្ធនៅទីនោះដើម្បីការពារទាំងប្រជាជន Donbass និងរុស្ស៊ីខ្លួនឯង” ។

គួររំឭកថា ប្រទេសរុស្ស៊ីបានចាប់ផ្តើមប្រតិបត្តិការយោធានៅក្នុងប្រទេសអ៊ុយក្រែនកាលពីថ្ងៃទី ២៤ ខែកុម្ភៈ ពោលរយៈពេល ២ ថ្ងៃ បន្ទាប់ពីបានទទួលស្គាល់ឯករាជ្យ និងអធិបតេយ្យភាពនៃសាធារណរដ្ឋប្រជាមានិត Donetsk និង Lugansk ក៏ដូចជាតំបន់ Donbass រួមទាំងការស្នើសុំជំនួយយោធាពីសំណាក់តំបន់ទាំងនេះជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក ពូទីន ថា ក្រុមភេរវកររបស់ អ៊ុយក្រែន ត្រូវតែទទួលខុសត្រូវសោកនាដកម្មនៅ Donbass