លោក ប្រាយុទ្ធ អះអាងថា អាណត្តិរបស់លោកជានាយករដ្ឋមន្ត្រីថៃ គឺដល់ឆ្នាំ ២០២៥ឯណោះ (មានវីដេអូ)

នាយករដ្ឋមន្រ្ដីព្យួរតួនាទីរបស់ប្រទេសថៃ លោក ប្រាយុទ្ធ ចាន់អូចា បានអះអាងថា អាណត្តិ ៨ឆ្នាំរបស់លោកនៅក្នុងតំណែង មិនបានផុតកំណត់កាលពីថ្ងៃទី២៤ខែសីហាដូចដែលលើកឡើងដោយគណបក្សប្រឆាំងទេ ព្រោះអាណត្តិរបស់លោក គួរតែត្រូវបានរាប់ចាប់ពីពេលដែលរដ្ឋធម្មនុញ្ញឆ្នាំ២០១៧ចូលជាធរមាន នៅថ្ងៃទី៦ ខែមេសា ឆ្នាំ២០១៧។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍ជាលាយលក្ខណ៍អក្សរទៅកាន់តុលាការធម្មនុញ្ញដែលបែកធ្លាយ បានបង្ហាញថា អាណត្តិរបស់លោក ប្រាយុទ្ធ បានចាប់ផ្តើមនៅថ្ងៃទី៦ខែមេសា ឆ្នាំ ២០១៧ ជាថ្ងៃដែលរដ្ឋធម្មនុញ្ញបច្ចុប្បន្នចូលជាធរមាន។ ដូច្នេះហើយ ឋានៈជានាយករដ្ឋមន្ត្រីរបស់លោក ប្រាយុទ្ធ នៅមុនកាលបរិច្ឆេទនោះ នឹងមិនត្រូវបានគិតទេ។

លោក ប្រាយុទ្ធ ថែមទាំង​បាន​អះអាងផងដែរ​ថា ​អាណត្តិ​របស់​លោក​គឺ​ស្រប​តាម​ស្តង់ដារ​អន្តរជាតិ និង​នីតិរដ្ឋ ពោល​គឺ​មេដឹកនាំ​រដ្ឋាភិបាល ​មិន​គួរ​ត្រូវ​បាន​អនុញ្ញាត​ឲ្យ​កាន់​អំណាច​យូរ​ពេក​ទេ។

ក្នុងសេចក្តីថ្លែងការណ៍នោះ លោកបញ្ជាក់ថា លោកបានបំពេញតួនាទីជានាយករដ្ឋមន្ត្រីដោយស្មោះត្រង់ និងស្មោះស្ម័គ្រ ហើយតែងតែគិតគូរពីកាតព្វកិច្ចការពារផលប្រយោជន៍សាធារណៈក្រោមរបបប្រជាធិបតេយ្យដែលមានព្រះមហាក្សត្រជាប្រមុខ។

សរុបសេចក្តីមក លោកអះអាងថា អាណត្តិ៨ឆ្នាំរបស់លោកជានាយករដ្ឋមន្ត្រី គឺនឹងបន្តរហូតដល់ឆ្នាំ២០២៥ឯណោះ។

គួរបញ្ជាក់ជាថ្មី តុលាការធម្មនុញ្ញបានព្យួរតំណែងលោក ប្រាយុទ្ធ កាលពីថ្ងៃទី២៤ ខែសីហា បន្ទាប់ពីតុលាការទទួលយកញត្តិរបស់គណបក្សភឿថៃ ដែលជំទាស់ថា អាណត្តិរបស់លោកប្រាយុទ្ធ បានផុតកំណត់នៅថ្ងៃទី ២៤ ខែសីហា៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Thai PBS

ចុចអាន៖ លោក ថាក់ស៊ីន ផ្តាំផ្ញើពាក្យប៉ុន្មានម៉ាត់ ទៅលោក ប្រាយុទ្ធ ក្រោយត្រូវព្យួរតំណែង