ពលរដ្ឋក្នុងទីក្រុងបាងកក ភ្ញាក់ផ្អើលពេលឃើញមឈូស​អណ្តែត​​ក្នុងភូមិ

ពលរដ្ឋថៃមានការភ្ញាក់ផ្អើល និងស្រែកឆោឡោយ៉ាងខ្លាំងនៅពេលដែលឃើញក្តារមឈូសអណ្តែតពាសវាលពាសកាល នៅក្នុងភូមិ ខណ:ដែលមានទឹកជំនន់លិចនៅក្នុងភូមិនោះ ។

ហេតុការដ៏គួរអោយតក់ស្លុតនេះ បានកើតឡើងកាលពីព្រឹកថ្ងៃទី៩ ខែកញ្ញា ឆ្នាំ២០២២ កន្លងទៅថ្មីៗនេះ ស្របពេលដែលទឹកជំនន់កំពុងវាយលុកយ៉ាងខ្លាំងនៅក្នុងទីក្រុងបាងកក និងបណ្តាខេត្តជាច្រើនទៀតនៅក្នុងប្រទេសថៃ។

យោងតាមការផ្សព្វផ្សាយរបស់សារព័ត៌មានក្នុងស្រុកបានបញ្ជាក់ថា នៅព្រឹកនោះ គឺនៅជាយភូមិមួយក្នុងតំបន់រុាំងសិត នាទីក្រុងបាងកក ដោយសារតែទឹកជំនន់លិចទាំងស្រុងនៅក្នុងតំបន់នេះ គឺមានប្រជាពលរដ្ឋថៃនាំគ្នាស្រែកដោយការភ្ញាក់ផ្អើល បន្ទាប់ពីពួកគាត់បានឃើញក្តារមឈូសចំនួន៣ បានអណ្តែតក្នុងភូមិ ។

នៅពេលនោះដែរក៏មានអ្នកខ្លះទៅបើកគម្របមើល គឺជាក្តារមឈូសទទេពុំមានសពនៅក្នុងនោះឡើយ ប៉ុន្តែទោះបីជាយ៉ាងនេះក្តី ក៏ពួកគេចេះតែពិចារណាទៅតាមអបីយ៍ជំនឿរៀងៗខ្លួន ទៅតាមដែលពួកគេយល់ឃើញ។

ដោយឡែកលោក ចូត ជាអ្នកធ្វើក្តារមឈូសលក់នៅក្បែតំបន់នេះបាននិយាយថា នៅមុននេះមួយថ្ងៃ គឺចាប់ពីម៉ោង​១២​ថ្ងៃត្រង់ មានភ្លៀងធ្លាក់រហូតដល់ព្រលប់ បន្ទាប់មកក៏មានទឹកជន់ឡើងតែម្តងដោយលោកមិនបានដឹងថា មឈូសរបស់លោកដែលធ្វើនៅខាងក្រៅផ្ទះ អណ្តែតចេញទៅតាមភូមិនោះឡើយ ទើបតែព្រឹកឡើងទើបដឹងថា មឈូសរបស់លោកបាត់អស់មួយចំនួន ទើបលោកបានដើរប្រមូលតាមភូមិយកមកវិញ ដែលបញ្ហានេះលោកគ្មានចេតនានោះឡើយ ៕

អត្ថបទ៖ សោ និយមរ័ត្ន