អាមេរិក ចេញការព្រមាន ខណៈជំនន់ទឹកភ្លៀង ជន់លិចទីក្រុង Chicago (មានវីដេអូ)

សេវាអាកាសធាតុជាតិសហរដ្ឋអាមេរិក (NWS) កាលពីថ្ងៃអាទិត្យទី១១ខែកញ្ញា បានចេញការព្រមានអំពីជំនន់ទឹកភ្លៀង សម្រាប់ភាគឦសាននៃរដ្ឋ Illinois រួមទាំងទីក្រុង Chicago ផងដែរ បន្ទាប់ពីភ្លៀងធ្លាក់ខ្លាំងបានជន់លិចផ្លូវ ជាប់គាំងរថយន្ត និងហូរចូលទៅក្នុងបន្ទប់ក្រោមដី។

អ្នកក្រុង Chicago បានចែករំលែករូបថត និងវីដេអូនៅលើប្រព័ន្ធផ្សព្វផ្សាយសង្គម ដែលបង្ហាញរថយន្ត ត្រូវទឹកលិចនៅផ្លូវក្រោមដី និងទុយោទឹកផ្ទុះនៅតាមចិញ្ចើមផ្លូវ។

ថ្វីបើភ្លៀងធ្លាក់ខ្លាំងបានរាំងនៅម៉ោងប្រហែល១១ព្រឹកក៏ដោយ ក៏ NWS បានព្រមានថា ផ្លូវនឹងនៅតែជន់លិចទឹក ព្រោះតែលូហូរមិនទាន់។

សាលាក្រុងបានបង្ហោះ Twitter ជំរុញឲ្យ ប្រជាពលរដ្ឋចៀសវាងការបើកបរឆ្លងកាត់ផ្លូវលិចទឹក ផ្លូវកាត់ និងតំបន់ដែលទាប។

ក្រុមប្រឹក្សាអន្តររដ្ឋាភិបាលស្តីពីការប្រែប្រួលអាកាសធាតុ ហៅកាត់ IPCC បានព្យាករអំពីទឹកជំនន់ខ្លាំងបន្ថែមទៀតសម្រាប់តំបន់ Midwest។

យោងតាមការិយាល័យគ្រប់គ្រងទឹករបស់ទីក្រុង Chicago បានឲ្យដឹងថា ព្រឹត្តិការណ៍ភ្លៀងធ្លាក់ធ្ងន់ធ្ងរពិបាកព្យាករ បានកើនឡើងខ្លាំងក្នុងរយៈពេលប៉ុន្មានឆ្នាំថ្មីៗនេះ។

ទីក្រុង Chicago បានចាប់ផ្តើមដំឡើងឧបករណ៍ទប់ទឹក នៅតាងអាងស្តុកទឹក ដែលការពារលូមិនឲ្យជន់លិច ប៉ុន្តែការធ្វើបែបនេះ អាចធ្វើឲ្យទឹកជំនន់តាមផ្លូវ កាន់តែអាក្រក់ទៅៗ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Reuters

ចុចអាន៖ ថៃ ព្រមានគ្រោះទឹកជំនន់ ជន់លិចទូទាំងប្រទេស