ផ្លូវនៅទីក្រុង ហូជីមិញ ប្រែទៅជា “ដងទន្លេ” ដោយសារតែទឹកជំនន់ (មានវីដេអូ)

ផ្លូវជាច្រើននៅតំបន់ទំនាបក្នុងទីក្រុងហូជីមិញបានប្រែក្លាយទៅជា “ដងទន្លេ” ដោយសារតែទឹកឡើងខ្ពស់ខ្លាំងកាលពីរសៀលថ្ងៃអង្គារ ។

ថ្វីបើវាមិនទាន់ឈានដល់កម្រិតកំពូលក៏ដោយ ក៏ទឹកជំនន់នៅតែបង្កការលំបាកជាច្រើនសម្រាប់អ្នករស់នៅក្នុងសង្កាត់ជាច្រើន ជាពិសេសអ្នកធ្វើដំណើរតាមដងផ្លូវលិចទឹក ពោលអ្នកជិះម៉ូតូមួយចំនួនបានដួល ហើយរថយន្តបានរងការខូចខាតជាដើម ។

ចំណែកលើផ្លូវ Tran Xuan Soan ក្នុងសង្កាត់ District 7 ដែលនៅតាមច្រាំងទន្លេ Te, ទឹកបានចាប់ផ្តើមហូរចូលផ្លូវនៅម៉ោងប្រហែល ៥ និង ៣០ នាទីល្ងាច ។

ផ្នែក​ដែល​លិច​ទឹកខ្លាំង​ជាងគេ​គឺ​នៅ​ជិត​ជើង​ស្ពាន Tan Thuan ពោល​កម្ពស់​ទឹក​ហក់​ដល់ ​២០ ​សង់ទីម៉ែត្រ ខណៈនៅ​ទីតាំង​ខ្លះ​ទឹក​ជន់​ឡើង​កម្ពស់ ​៤០ ​សង់ទីម៉ែត្រ ។

ជារៀងរាល់ខែទឹកឡើងខ្លាំងតែងតែវាយប្រហារទីក្រុងហូជីមិញ ជាពិសេសចាប់ពីខែសីហាដល់ខែមករា ខណៈទឹកឡើងខ្លាំងបំផុតនោះគឺនៅខែកញ្ញា និងតុលា ។

បើយោងតាមស្ថានីយ៍វារីអគ្គីសនីភាគខាងត្បូងបានឲ្យដឹងថា ទឹកឡើងខ្លាំងកាលពីថ្ងៃអង្គារត្រូវបានវាស់នៅកម្រិត ១.៥៥ ទៅ ១.៥៨ ម៉ែត្រ ហើយត្រូវបានគេរំពឹងថានឹងបន្តអូសបន្លាយរហូតដល់ល្ងាចថ្ងៃពុធនេះ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ ឈៀងម៉ៃ ជួបគ្រោះរញ្ជួយដី ខណៈខេត្តភាគច្រើន ថៃ កំពុងមានទឹកជំនន់