ព្យុះទីហ្វុង Muifa បង្កឲ្យមានការបាក់ដី២លើក នៅភាគខាងកើតប្រទេស ចិន

នៅថ្ងៃព្រហស្បតិ៍ទី១៥ខែកញ្ញានេះ ព្យុះទីហ្វុង Muifa បានបង្កឲ្យមានការបាក់ដីជាលើកទីពីរនៅតំបន់ឆ្នេរសមុទ្រភាគខាងកើតដែលមានប្រជាជនរស់នៅយ៉ាងក្រាស់ក្រែល របស់ប្រទេសចិន បន្ទាប់ពីព្យុះនេះបណ្តាលឲ្យមានការលុបចោលជើងហោះហើរដឹកអ្នកដំណើរទាំងអស់ នៅអាកាសយានដ្ឋានអន្តរជាតិចំនួនពីរក្នុងទីក្រុង សៀងហៃ។

យោងតាមទីភ្នាក់ងារសារព័ត៌មានរដ្ឋ Xinhua, ព្យុះដែលមានកម្លាំងខ្យល់បក់រហូតដល់ ១២៦គីឡូម៉ែត្រក្នុងមួយម៉ោង មួយនេះ បានបង្កឲ្យមានការបាក់ដីនៅម៉ោង ១២:៣០ រំលងអាធ្រាត្រក្នុងស្រុក Fengxian នៃទីក្រុងសៀងហៃ។

មុននេះ ព្យុះ Muifa បានវាយប្រហារទីក្រុង Zhoushan ក្នុងខេត្ត Zhejiang កាលពីថ្ងៃពុធ។

រដ្ឋបាលឧតុនិយមកណ្តាលរបស់ប្រទេសចិន បានចេញការព្រមានអំពីព្យុះទីហ្វុងកម្រិតខ្ពស់បំផុតរបស់ខ្លួនជាលើកដំបូងក្នុងឆ្នាំនេះ ដោយនិយាយថា Muifa នឹងបង្កើនកម្លាំងនៅពេលដែលវាខិតជិតឆ្នេរសមុទ្រ។

ស្របពេលជាមួយគ្នានោះ ទីភ្នាក់ងារអាកាសធាតុបាននិយាយថា ខ្យល់កន្ត្រាក់ និងភ្លៀងធ្លាក់ខ្លាំង ត្រូវបានព្យាករណ៍តាមបណ្ដោយឆ្នេរសមុទ្រភាគខាងកើតរបស់ប្រទេសចិន នៅថ្ងៃព្រហស្បតិ៍នេះ។ តំបន់ពាក់ព័ន្ធ គួរតែយកចិត្តទុកដាក់លើការទប់ស្កាត់ជំនន់ទឹកភ្លៀង និងគ្រោះមហន្តរាយភូមិសាស្ត្រដែលអាចបណ្តាលមកពីភ្លៀងធ្លាក់ខ្លាំង។

ព្យុះនេះកើតឡើងភ្លាមៗ បន្ទាប់ពីព្យុះទីហ្វុង Hinnamnoor បានវាយប្រហារទីក្រុងសៀងហៃ និងតំបន់ជិតខាងរបស់ខ្លួនកាលពីសប្តាហ៍មុន ដែលបណ្តាលឲ្យមានការផ្អាកសេវាកម្មស្រឡាងក្រុងសៀងហៃ និងការបិទសាលារៀននៅក្នុងផ្នែកខ្លះនៃខេត្ត Zhejiang។

គួរបញ្ជាក់ថា Muifa គឺជាព្យុះទី ១២ ដែលវាយប្រហារប្រទេសចិនក្នុងឆ្នាំនេះ៕

ប្រែសម្រួល៖ Vann Vann

ប្រភព៖ ABS-CBN

ចុចអាន៖ ចិន បិទកំពង់ផែ សាលារៀន និងជម្លៀសមនុស្សជាង១ម៉ឺននាក់ ដោយសារព្យុះទីហ្វុង Muifa