អ៊ុយក្រែន រកឃើញផ្នូរដាក់សពមនុស្សជាង ៤០០នាក់ក្នុងទីក្រុង Izium ក្រោយរុស្ស៊ី ដកទ័ព (មានវីដេអូ)

អាជ្ញាធរអ៊ុយក្រែន បានរកឃើញផ្នូរដ៏ធំមួយ ដែលមានដាក់សពមនុស្សចំនួន ៤៤០នាក់នៅទីក្រុង Izium ដែលទើបវាយដណ្តើមបានពីកងកម្លាំងរុស្ស៊ីវិញ កាលពីប៉ុន្មានថ្ងៃមុន។

ទាហានរុស្ស៊ីរាប់ពាន់នាក់ បានរត់ចេញពីទីក្រុង Izium កាលពីចុងសប្តាហ៍មុន បន្ទាប់ពីបានកាន់កាប់ទីក្រុងនេះ និងប្រើប្រាស់ទីនោះជាមជ្ឈមណ្ឌលដឹកជញ្ជូននៅក្នុងតំបន់ Kharkiv។ ទាហានរុស្ស៊ី ក៏បានបន្សល់ទុកនូវគ្រាប់រំសេវ និងឧបករណ៍មួយចំនួនធំផងដែរ។

លោក Serhiy Bolvinov មេប៉ូលិសស៊ើបអង្កេតប្រចាំតំបន់ Kharkiv បានប្រាប់ Sky News ថា ​“ខ្ញុំអាចនិយាយបានថា វាជាកន្លែងកប់សពដ៏ធំបំផុតមួយនៅក្នុងទីក្រុងធំ នៃតំបន់ទើបរំដោះបាន។ សពមនុស្សចំនួន៤៤០នាក់ ត្រូវបានកប់នៅក្នុងកន្លែងតែមួយ។ អ្នក​ខ្លះ​ស្លាប់​ដោយ​សារ​ការ​បាញ់​កាំភ្លើង​ធំ អ្នក​ខ្លះ​ស្លាប់​ដោយ​សារ​ការ​វាយ​ប្រហារ​ពី​អាកាស”។

ទោះបីជាយ៉ាងណាក៏ដោយ ភ្លាមៗនេះ រ៉យទ័រ មិនអាចផ្ទៀងផ្ទាត់ការអះអាងរបស់អ៊ុយក្រែនបានទេ ហើយក៏មិនមានការអត្ថាធិប្បាយជាសាធារណៈ ពីរុស្ស៊ីលើការចោទប្រកាន់នេះដែរ។

ស្របពេលជាមួយគ្នានោះ លោកប្រធានាធិបតី Volodymyr Zelensky បានដាក់ការស្តីបន្ទោសលើប្រទេសរុស្ស៊ី ហើយបានប្រដូចការរកឃើញនេះ ទៅនឹងអ្វីដែលបានកើតឡើងក្នុងតំបន់ Bucha នៅជាយក្រុង កៀវ ក្នុងដំណាក់កាលដំបូងនៃការលុកលុយរបស់កងកម្លាំងរុស្ស៊ី កាលពីចុងខែកុម្ភៈ។

អ៊ុយក្រែន និងសម្ព័ន្ធមិត្តលោកខាងលិច បានចោទប្រកាន់កងកម្លាំងរុស្ស៊ី ពីបទប្រព្រឹត្តឧក្រិដ្ឋកម្មសង្គ្រាមនៅទីនោះ។ មន្ត្រីអ៊ុយក្រែនបាននិយាយកាលពីខែមេសាថា ជនស៊ីវិលរាប់ម៉ឺននាក់ទំនងជាត្រូវបានសម្លាប់នៅក្នុងការវាយលុកដាច់ដោយឡែករបស់រុស្ស៊ី លើកំពង់ផែ Mariupol ភាគខាងត្បូង។

យ៉ាងណាក្តី រុស្ស៊ី​បាន​បដិសេធ​ការ​កំណត់​គោលដៅលើ​ជន​ស៊ីវិល ឬ​ប្រព្រឹត្ត​ឧក្រិដ្ឋកម្ម​សង្គ្រាម៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ អ៊ុយក្រែន បើកការវាយប្រហារចូលទឹកដីរុស្ស៊ី បណ្តាលឲ្យមានមនុស្សស្លាប់