លើកដំបូង ជប៉ុន មានប្រជាជនអាយុចាប់ពី ១០០ ឆ្នាំឡើងលើស ៩ ម៉ឺននាក់

ចំនួនប្រជាជនដែលមានអាយុចាប់ពី ១០០ ឆ្នាំឡើងទៅក្នុងប្រទេសជប៉ុនបានកើនលើស ៩០,០០០ នាក់ជាលើកដំបូង ហើយជាការកើនឡើងដល់កម្រិតខ្ពស់ថ្មីក្នុងរយៈពេល ៥២ ឆ្នាំជាប់ៗគ្នា ។

ក្រសួងសុខាភិបាលនិយាយថា គិតត្រឹមថ្ងៃព្រហស្បតិ៍ មានមនុស្សអាយុចាប់ពី ១០០ ឆ្នាំឡើងចំនួន ៩០,៥២៦ នាក់ក្នុងប្រទេស ពោលកើនឡើងប្រហែល ៤,០០០ នាក់ បើធៀបនឹងឆ្នាំមុន ខណៈស្ត្រីមានដល់ជិត ៩០ ភាគរយ ។ ចំនួន​នេះ​បាន​កើន​ឡើង​ជា​បន្តបន្ទាប់ ​ចាប់​តាំង​ពី​ឆ្នាំ ១៩៧០ ពោលនៅឆ្នាំនោះ ប្រជាជនដែលមានអាយុ ១០០ ឆ្នាំឡើង​មាន​តែ ៣១០ ​នាក់​ប៉ុណ្ណោះ ។

បច្ចុប្បន្នអ្នកចាស់ជាងគេគឺលោកយាយ Tatsumi Fusa មានវ័យ ១១៥ ឆ្នាំជាស្ត្រីរស់នៅក្នុងខេត្ត Osaka ខណៈបុរសចំណាស់ជាងគេនៅប្រទេសជប៉ុនគឺលោកតា Nakamura Shigeru វ័យ ១១១ ឆ្នាំរស់នៅក្នុងខេត្ត Hiroshima ។

ចំណែនៅតាម​តំបន់ផ្សេងៗ, ខេត្ត Shimane មានអ្នកមានអាយុចាប់ពី ១០០ ឆ្នាំខ្ពស់ជាងគេ​ ពោល​មាន ១៤២ នាក់​ក្នុង​ចំណោម ១០០,០០០ នាក់ បន្ទាប់​មក​គឺ​ខេត្ត Kochi និងខេត្ត Tottori ខណៈខេត្ត Saitama មានតិចជាងគេគឺ ៤៣ នាក់ប៉ុណ្ណោះក្នុង ១០០,០០០ នាក់ ហើយស្ថិតនៅបាតតារាងក្នុងរយៈពេល ៣៣ ឆ្នាំជាប់ៗគ្នា ។

ក្រសួងនិយាយថា មនុស្សប្រហែល ៤៥,០០០ នាក់នឹងឈានដល់អាយុ ១០០ ឆ្នាំនៅចុងខែមីនា ដោយចំនួននេះរាប់បញ្ចូលទាំងពលរដ្ឋជប៉ុនដែលរស់នៅក្រៅប្រទេស និងជនបរទេសដែលមានសិទ្ធិស្នាក់នៅក្នុងប្រទេសជប៉ុនជាអចិន្ត្រៃយ៍ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ជប៉ុន អនុញ្ញាឲ្យភ្ញៀវទេសចរបរទេសមិនមានទិដ្ឋាការស្នាក់នៅបានវិញ