លោក Zelensky ថា ទីតាំងធ្វើទារុណកម្មយ៉ាងតិច ១០ កន្លែង ត្រូវបានរកឃើញក្នុងតំបន់ ទើបរំដោះបាន

ប្រធានាធិបតីអ៊ុយក្រែនលោក Volodymyr Zelensky បាននិយាយថា ទីតាំងយ៉ាងតិច ១០កន្លែង ត្រូវបានគេរកឃើញនៅក្នុងតំបន់ Kharkiv ភាគខាងកើតដែលទើបរំដោះបាន ហើយទីនោះជាកន្លែងដែលលោកជឿថា ត្រូវបានប្រើប្រាស់ដើម្បីធ្វើទារុណកម្ម។

លោក Zelensky បាននិយាយនៅក្នុងវីដេអូ ដែលចេញផ្សាយកាលពីថ្ងៃសៅរ៍ទី១៧ខែកញ្ញាថា ស្ថានីយ៍រថភ្លើងមួយ គឺស្ថិតក្នុងចំណោមកន្លែងធ្វើទារុណកម្ម។ លោក​ក៏​បានលើកឡើងផងដែរ​ថា ឧបករណ៍​ឆក់សម្រាប់ធ្វើ​ទារុណកម្ម​ ​ត្រូវ​បាន​រក​ឃើញ។

លោកប្រធានាធិបតី បានថ្កោលទោសរុស្ស៊ី ដោយនិយាយថា ការធ្វើទារុណកម្ម ហាក់ដូចជាបានប្រព្រឹត្តឡើងយ៉ាងទូលំទូលាយ នៅក្នុងទឹកដីដែលកាន់កាប់ដោយកងកម្លាំងទីក្រុងមូស្គូ។

អាជ្ញាធរអ៊ុយក្រែន បានបើកការស៊ើបអង្កេតមួយ បន្ទាប់ពីកន្លែងបញ្ចុះសពដ៏ធំ ត្រូវបានរកឃើញនៅក្នុងទីក្រុងសំខាន់ Izyum នៃតំបន់ Kharkiv។

គួរបញ្ជាក់ថា កងកម្លាំង​អ៊ុយក្រែន ​បាន​ដណ្តើម​យក​​ភាគ​ច្រើន​នៃ​តំបន់​ភាគ​ខាង​កើតមក​វិញ ហើយ​កំពុង​បង្កើន​ការ​វាយលុក​របស់​ខ្លួន​នៅ​ភាគ​ខាង​ត្បូងជាបន្តទៀត៕

ប្រែសម្រួល៖ Vann Vann

ប្រភព៖ NHK

ចុចអាន៖ ពូទីន ព្រមានឆ្លើយតបធ្ងន់ធ្ងរជាងមុន បើ អ៊ុយក្រែន នៅតែបន្តវាយបក