បាក់ដីនៅ នេប៉ាល់ ឆក់យកជីវិតមនុស្ស ២២នាក់

ក្រុមអ្នកជួយសង្គ្រោះនៅក្នុងប្រទេសនេប៉ាល់ កំពុងតស៊ូនឹងភ្លៀងធ្លាក់ខ្លាំង ដើម្បីទាញយកសពមនុស្សចេញពីគំនរបាក់បែកនៃផ្ទះ ដែលត្រូវបានកប់ក្រោមដីបាក់ ដែលបណ្តាលឲ្យមនុស្សចំនួន២២នាក់ស្លាប់ និង១០នាក់រងរបួស។

គ្រោះមហន្តរាយចុងក្រោយបំផុតនេះ បានកើតឡើងនៅក្នុងស្រុក Achham ដែលមានចម្ងាយប្រហែល ៤៥០ គីឡូម៉ែត្រ ភាគខាងលិចរដ្ឋធានី កដ្ឋមណ្ឌូ។

លោក Yagya Raj Joshi មន្ត្រីនៅតំបន់ Kailali បាននិយាយថា មនុស្សប្រហែល ១៥០០ នាក់ដែលផ្លាស់ទីលំនៅដោយសារតែទឹកជំនន់ បានទៅជ្រកកោននៅតាមអគារសាធារណៈ។

គួរបញ្ជាក់ថា ជំនន់ទឹកភ្លៀង និងការរអិលបាក់ដី គឺជារឿងធម្មតា ដែលកើតឡើងនៅតំបន់ជួរភ្នំនៃប្រជាជាតិហិមាល័យមួយនេះ ជាពិសេសអំឡុងរដូវភ្លៀងមូសុងប្រចាំឆ្នាំ ចន្លោះខែមិថុនា ដល់ខែកញ្ញា។

យោងតាមទិន្នន័យផ្លូវការបានឲ្យដឹងថា មនុស្សយ៉ាងតិច៧០នាក់បានស្លាប់ និង១៣នាក់បាត់ខ្លួននៅទូទាំងប្រទេស ក្នុងគ្រោះទឹកជំនន់ និងការរអិលបាក់ដីនៅឆ្នាំនេះ៕

ប្រែសម្រួល៖ Vann Vann

ប្រភព៖ Reuters

ចុចអាន៖ ព័រតូរីកូ ប្រឈមការបាក់ដី និងទឹកជំនន់ដែលគំរាមកំហែងដល់អាយុជីវិត