ផ្ទុះគ្រាប់បែកក្នុងសាលារៀនប៉ាគីស្ថាន ស្លាប់និងរបួសមនុស្សជាង៥០នាក់

ប៉ូលិសបាននិយាយថា មនុស្ស៧នាក់បានស្លាប់និងជាង៥០នាក់ទៀតរងរបួសបន្ទាប់ពីការផ្ទុះអំឡុងពេលសិស្សកំពុងរៀនក្នុងសាលាសាសនាមួយនៅទីក្រុង Peshawar ភាគខាងជើងប្រទេសប៉ាគីស្ថាន។

មន្ត្រីម្នាក់នៅកន្លែងកើតហេតុបានប្រាប់ BBC ថា ក្មេងៗគឺស្ថិតក្នុងចំណោមអ្នកស្លាប់។

មិនទាន់មានក្រុមណាមួយអះអាងទទួលខុសត្រូវទេខណៈការស៊ើបអង្កេតបានចាប់ផ្តើម។

ទីក្រុង Peshawar ដែលស្ថិតនៅជិតព្រំដែនអាហ្វហ្គានីស្ថានបានជួបប្រទះអំពើហិង្សាអាក្រក់ៗមួយចំនួនក្នុងអំឡុងពេលនៃការបះបោររបស់ក្រុមតាលីបង់ក្នុងរយៈពេលប៉ុន្មានឆ្នាំថ្មីៗនេះ។

ប៉ូលិសបានប្រាប់ BBC ថា ការផ្ទុះនេះបានកើតឡើងនៅម៉ោងប្រហែល០៨និង៣០នាទីព្រឹក (ម៉ោងនៅប៉ាគីស្ថាន)។

មនុស្សប្រហែល៦០នាក់ត្រូវបានគេគិតថាកំពុងរៀនក្នុងថ្នាក់នៅសាលាសាសនាមួយដែលគេស្គាល់ថា Madrassa។

សាក្សីដែលឃើញហេតុការណ៍ផ្ទាល់ភ្នែកបានប្រាប់ប៉ូលិសថា គាត់បានឃើញបុរសម្នាក់ចូលក្នុងសាលាដោយមានកាបូបដាក់គ្រឿងផ្ទុះ មុនការផ្ទុះកើតឡើង។

ជំនួយការអធិការរងប៉ូលិសលោក Shafqat Malik បានប្រាប់កាសែត Express Tribune របស់ប្រទេសប៉ាគីស្ថានថា គ្រឿងផ្ទុះទម្ងន់៥គីឡូក្រាមត្រូវបានប្រើក្នុងការវាយប្រហារនេះ។

ទីភ្នាក់ងារសារព័ត៌មាន AFP បានដកស្រង់សម្តីប៉ូលិសដោយនិយាយថា គ្រូបង្រៀន២នាក់ស្ថិតក្នុងចំណោមអ្នករងរបួស៕

ប្រែសម្រួលដោយ៖ Vann Vann

ប្រភព៖ BBC