នាយករដ្ឋមន្ត្រីថ្មីរបស់ អង់គ្លេស បង្ហាញកញ្ចប់ទឹកប្រាក់ផ្ដល់ឲ្យ អ៊ុយក្រែន ក្នុងឆ្នាំ ២០២៣

នាយករដ្ឋមន្ត្រីថ្មីរបស់អង់គ្លេសលោកស្រី Liz Truss នឹងប្រាប់មេដឹកនាំពិភពលោកថា ការគាំទ្ររបស់ចក្រភពអង់គ្លេសសម្រាប់កិច្ចខិតខំប្រឹងប្រែងសង្រ្គាមអ៊ុយក្រែននៅឆ្នាំ ២០២៣ នឹងមានទំហំទឹកប្រាក់ ២.៦៣ ពាន់លានដុល្លារ ។

កាសែត Financial Times បានរាយការណ៍នៅថ្ងៃអង្គារនេះថា លោកស្រី Truss នឹងផ្តល់សារមិនគួរឲ្យជឿរបស់ចក្រភពអង់គ្លេសនៃការបន្តផ្ដល់ជំនួយយោធាដ៏ច្រើនសន្ធឹកសន្ធាប់ដល់ទីក្រុងកៀវ ក្នុងអំឡុងពេលដំណើរទស្សនកិច្ចទៅកាន់សហរដ្ឋអាមេរិក ជាកន្លែងដែលលោកស្រីគ្រោងនឹងថ្លែងទៅកាន់មហាសន្និបាតអង្គការសហប្រជាជាតិ (UNGA) នៅទីក្រុងញូវយ៉កនៅថ្ងៃពុធ ។

កាសែត Financial Times បានរាយការណ៍ទៀតថា “លោកស្រី Truss បានសន្យាជាមួយប្រជាជនអ៊ុយក្រែនថា ចក្រភពអង់គ្លេសនឹងបន្តនៅពីក្រោយអ៊ុយក្រែនគ្រប់ជំហាន ទោះស្ថិតក្នុងកាលៈទេសៈណាក៏ដោយ” ។

ស្របពេលជាមួយគ្នានេះវិមាន Downing Street ក៏បានប្រាប់កាសែត Financial Times ផងដែរថា ការប្តេជ្ញាចិត្តរបស់ទីក្រុងឡុងដ៍ចំពោះរដ្ឋាភិបាលទីក្រុងកៀវក្នុងឆ្នាំ ២០២២ នេះក៏មានទំហំទឹកប្រាក់ចំនួន ២.៦៣ ពាន់លានដុល្លារផងដែរ ហើយបានធ្វើឲ្យចក្រភពអង់គ្លេសក្លាយជាអ្នកផ្តល់ជំនួយយោធាធំបំផុតទី ២ ដល់អ៊ុយក្រែន ។

យោងតាមរបាយការណ៍បានឲ្យដឹងថា ជំនួយយោធារបស់ចក្រភពអង់គ្លេសបានពាក់ព័ន្ធនឹងការផ្តល់រ៉ុកកែតរាប់រយគ្រាប់ រថពាសដែកចំនួន ១២០ គ្រឿង ប្រព័ន្ធការពារដែនអាកាសចំនួន ៥ គ្រឿង ហើយកងទ័ពអ៊ុយក្រែនប្រមាណ ២៧,០០០ នាក់ត្រូវបានបណ្តុះបណ្តាលដោយកងកម្លាំងចក្រភពអង់គ្លេស ចាប់តាំងពីឆ្នាំ ២០១៥ មក ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ លោក Zelensky ឲ្យជម្រើស ២ ទៅទាហាន រុស្ស៊ី