កងកម្លាំង​សន្តិសុខ​អ៊ីរ៉ង់ បាញ់​កុមារី​​អាយុ​១០​ឆ្នាំ​ចំក្បាល អំឡុងពេលធ្វើបាតុកម្ម

ក្រុមសិទ្ធិមនុស្សបាននិយាយថា កងកម្លាំងសន្តិសុខអ៊ីរ៉ង់ បានបាញ់កាំភ្លើងចំក្បាលក្មេងស្រីជនជាតិឃើដ​ អាយុ១០ឆ្នាំម្នាក់ ដោយបណ្តាលឲ្យនាងរងរបួសយ៉ាងធ្ងន់ធ្ងរ នៅក្នុងទីក្រុង Bukan ដែលជាកន្លែង កំពុងផ្ទុះបាតុកម្មពាក់ព័ន្ធការស្លាប់របស់ Zhina Amini។

បាតុកម្មបានចាប់ផ្តើម បន្ទាប់ពីជនជាតិឃើដឈ្មោះ Mahsa Amini អាយុ ២២ ឆ្នាំមកពីទីក្រុង Saqiz របស់អ៊ីរ៉ង់ បានស្លាប់គួរឲ្យសង្ស័យកាលពីថ្ងៃសុក្រ បន្ទាប់ពីសន្លប់ដោយសារការប៉ះទង្គិច។

យោងតាមរបាយការណ៍របស់អង្គការសិទ្ធិមនុស្ស Hengaw និងក្រុមគ្រួសារបានឲ្យដឹងថា Amini ត្រូវបានចាប់ខ្លួនកាលពីថ្ងៃអង្គារសប្តាហ៍មុន ក្នុងទីក្រុង តេហេរ៉ង់ ហើយដាក់ឃុំឃាំង និងត្រូវបានគេធ្វើទារុណកម្មរាងកាយ។

ចាប់តាំងពីការស្លាប់របស់នាង បាតុកម្មបាននិងកំពុងបន្តនៅទូទាំងទីក្រុងរបស់ជនជាតិឃើដ ក្នុងតំបន់ Kurdistan ក៏ដូចជាខេត្ត West Azarbaijan ផងដែរ ដើម្បីជាការឆ្លើយតបទៅនឹងការដែលកងកម្លាំងសន្តិសុខអ៊ីរ៉ង់ ប្រើប្រាស់គ្រាប់កាំភ្លើងពិត ឧស្ម័នបង្ហូរទឹកភ្នែក និងកាណុងបាញ់ទឹកដើម្បីបំបែកពួកគេ។

ក្រុមសិទ្ធិមនុស្សបានកត់សម្គាល់នៅក្នុងការបង្ហោះ Facebook ដាច់ដោយឡែកថា បាតុករជនជាតិឃើដ២នាក់ឈ្មោះ Fuad Qadimi និង Mohsin Mohamedi ត្រូវបានសម្លាប់ ដោយគ្រាប់កាំភ្លើងពិត របស់កងកម្លាំងអ៊ីរ៉ង់កាលពីថ្ងៃចន្ទ និងជាង ១៥ នាក់ផ្សេងទៀតរងរបួស៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Bas News

ចុចអាន៖ អ៊ីរ៉ង់ គំរាម កម្ទេច អ៊ីស្រាអែល បើហ៊ានវាយប្រហារ កម្មវិធី នុយក្លេអ៊ែរ របស់ខ្លួន