តំបន់ផ្ដាច់ខ្លួនរបស់ អ៊ុយក្រែន ចំនួន ៤ នឹងបោះឆ្នោតចូលរួមជាមួយ រុស្ស៊ី

មេដឹកនាំផ្តាច់ខ្លួននៃតំបន់អ៊ុយក្រែនដែលគ្រប់គ្រងដោយរុស្ស៊ីចំនួន ៤ បាននិយាយកាលពីថ្ងៃអង្គារថា ពួកគេគ្រោងនឹងរៀបចំការបោះឆ្នោតនៅចុងសប្តាហ៍នេះដើម្បីឲ្យទឹកដីទាំងនេះក្លាយជាផ្នែកមួយនៃប្រទេសរុស្ស៊ី នៅពេលដែលទីក្រុងមូស្គូបានបាត់បង់ដីនៅក្នុងសង្រ្គាមដែលវាបានចាប់ផ្តើមជិត ៧ ខែមកនេះ ។

តំបន់ទាំង ៤ នោះគឺ Donetsk, Kherson, Luhansk និង Zaporizhzhia ខណៈការប្រកាសធ្វើប្រជាមតិដែលនឹងចាប់ផ្តើមពីថ្ងៃសុក្រនេះទៅបានកើតឡើង បន្ទាប់ពីសម្ព័ន្ធមិត្តជិតស្និទ្ធរបស់ប្រធានាធិបតីរុស្ស៊ីលោក វ្ល៉ាឌីមៀរ ពូទីន បាននិយាយថា វាគឺជារឿងចាំបាច់ ។

ទន្ទឹមនោះ លោក Denis Pushilin មេតំបន់ Donetsk បាននិយាយថា “ប្រជាជនដែលរងទុក្ខយ៉ាងយូរនៅតំបន់ Donbass នឹងទទួលបានសិទ្ធិដើម្បីក្លាយជាផ្នែកមួយនៃប្រទេសដ៏អស្ចារ្យដែលពួកគេតែងតែចាត់ទុកមាតុភូមិរបស់ពួកគេ ហើយការ​បោះឆ្នោត​នេះ​នឹង​ជួយ​ស្ដារ​យុត្តិធម៌​ជា​ប្រវត្តិសាស្ត្រ​ដែល​ប្រជាជន​រុស្ស៊ី​រាប់​លាន​នាក់​កំពុង​រង់ចាំ” ។

ដោយឡែកមេដឹកនាំដែលគាំទ្រដោយទីក្រុងមូស្គូនៅក្នុងតំបន់ Kherson ភាគខាងត្បូងអ៊ុយក្រែនដែលកាន់កាប់ដោយរុស្ស៊ី និងសកម្មជនគាំទ្ររុស្ស៊ីកាន់កាប់នៅក្នុងតំបន់ Zaporizhzhia ក៏បានចូលរួមការអំពាវនាវដល់អាជ្ញាធរបំបែកខ្លួននៅតំបន់ Luhansk និង Donetsk ផងដែរសម្រាប់ការធ្វើប្រជាមតិយ៉ាងឆាប់រហ័សក្នុងការចូលរួមជាមួយប្រទេសរុស្ស៊ី ។

សម្ពាធនៅក្នុងប្រទេសរុស្ស៊ី និងពីមេដឹកនាំដែលគាំទ្រដោយទីក្រុងមូស្គូនៅតំបន់ Luhansk និង Donetsk សម្រាប់ការបោះឆ្នោតក្នុងតំបន់ដែលនឹងត្រួសត្រាយផ្លូវរបស់ពួកគេទៅកាន់ភាពជារុស្ស៊ីពេញលេញបានកើនឡើង បន្ទាប់ពីការវាយលុករបស់អ៊ុយក្រែនមានការគាំទ្រដោយអាវុធដែលផ្គត់ផ្គង់ដោយលោកខាងលិចលើទឹកដីរបស់ខ្លួនដែលកាន់កាប់ដោយរុស្ស៊ី ។

គួរបញ្ជាក់ថា ការ​បោះឆ្នោតរបស់តំបន់ទាំងនេះសម្រាប់ការចូលរួមជាមួយរុស្ស៊ី​អាច​កំណត់​ដំណាក់កាល​ក្នុង​ការ​បង្កើន​ជម្លោះរបស់ទីក្រុងមូស្គូ ស្របពេលដែលការប្រយុទ្ធរបស់​កងកម្លាំង​អ៊ុយក្រែនកំពុងបង្ហាញភាពជោគជ័យ​កាន់តែ​ខ្លាំង​ឡើងក្នុងការដណ្តើម​យក​ទឹកដី​ពីរុស្ស៊ីមកវិញ ៕

ប្រែសម្រួលដោយ ៖ ជីវ័ន្ត

ប្រភព ៖ Daily Sabah

ចុចអាន ៖ ប្រទេសសម្ព័ន្ធមិត្ត រុស្ស៊ី ឲ្យទាហានប្រុងជើងការ ចំពេលមានភាពតានតឹងនៅ​ព្រំដែន អឺរ៉ុប