ព្យុះទីហ្វុង Molave សម្លាប់មនុស្សយ៉ាងតិច ៩ នាក់នៅហ្វីលីពីន មុនពេលធ្វើដំណើរទៅប្រទេសវៀតណាម

បើយោងតាមមន្រ្តីឆ្លើយតបនឹងគ្រោះមហន្តរាយហ្វីលីពីនបានឲ្យដឹងថា ព្យុះទីហ្វុង Molave បានសម្លាប់មនុស្សយ៉ាងហោចណាស់ ៩ នាក់ និង ១៣ នាក់ផ្សេងទៀតកំពុងបាត់ខ្លួននៅហ្វីលីពីន មុនពេលធ្វើដំណើរទៅសមុទ្រចិនខាងត្បូង និងឆ្ពោះទៅកាន់ប្រទេសវៀតណាម ។

ព្យុះនេះបានប៉ះពាល់ដល់ប្រជាជនជាង ៩០០,០០០ នាក់នៅក្នុងប្រទេសហ្វីលីពីនមុនពេលឆ្ពោះទៅកាន់សមុទ្រចិនខាងត្បូង និងវៀតណាមនៅម៉ោងប្រហែល ៨ ព្រឹកថ្ងៃអង្គារនេះ ។ ការិយាល័យអាកាសធាតុហ្វីលីពីនបាននិយាយថា វាទំនងជានឹងមានសន្ទុះ និងរលកកាន់តែខ្លាំងបន្ថែមទៀតនៅសមុទ្រ និងឈានដល់កម្រិតកំពូលក្នុងរយៈពេល ២៤ ម៉ោង ។

យោងតាមមជ្ឈមណ្ឌលឧតុនិយមក្នុងតំបន់បានឲ្យដឹងថា តំបន់ភាគខាងជើងនៃតំបន់ខ្ពង់រាបកណ្តាលរបស់ប្រទេសវៀតណាមដែលជាកន្លែងផលិតកាហ្វេរបស់ប្រទេសនេះត្រូវបានគេព្យាករណ៍ថានឹងទទួលកម្រិតទឹកភ្លៀង ២០០ មីល្លីម៉ែត្រចាប់ពីល្ងាចថ្ងៃអង្គារនេះតទៅ ។

ទន្ទឹមនោះបើយោងតាមគេហទំព័ររបស់រដ្ឋាភិបាលវៀតណាមបានបានឲ្យដឹងថា ប្រទេសវៀតណាមបានជម្លៀសប្រជាជននៅតំបន់កណ្តាលជិត ១.៣ លាននាក់ក្នុងរយៈពេល ៧ ថ្ងៃចុងក្រោយនេះ ខណៈដែលប្រទេសនេះត្រូវបានវាយប្រហារលើកដំបូងដោយព្យុះ Saudel ហើយបច្ចុប្បន្នកំពុងប្រឈមនឹងព្យុះ Molave ហើយមនុស្ស ១១១ នាក់បានស្លាប់ក្នុងអំឡុងពេលព្យុះ និងការរអិលបាក់ដីនៅតាមបណ្តោយឆ្នេរភាគកណ្តាល និងតំបន់ខ្ពង់រាបចន្លោះថ្ងៃទី ៦ និងថ្ងៃទី ២០ ខែតុលា ខណៈមនុស្ស ២២ នាក់បានបាត់ខ្លួន ៕

ប្រែសម្រួលដោយ ៖ ជីវ័ន្ត

ប្រភព ៖ Bloomberg