លោក Zelensky ថា ការកែនទ័ពរបស់លោក ពូទីន បង្ហាញពី “ការដួលរលំ” របស់ រុស្ស៊ី នៅ អ៊ុយក្រែន

លោកប្រធានាធិបតី Volodymyr Zelensky បាននិយាយថា ការកែនទ័ពបម្រុងមួយផ្នែករបស់រុស្ស៊ីបង្ហាញពីការដួលរលំនៃយោធារបស់លោក វ្ល៉ាឌីមៀរ ពូទីន ក្នុងប្រទេសអ៊ុយក្រែន ។

លោក Zelensky បាននិយាយនៅក្នុងសេចក្តីថ្លែងការណ៍មួយថា “អ៊ុយក្រែនបានគ្រប់គ្រងការផ្លាស់ប្តូរដំណើរនៃសង្រ្គាម ហើយវាក៏បង្ហាញឲ្យឃើញផងដែរថា យើងអាចឈ្នះ និងកំពុងឆ្ពោះទៅរកជ័យជម្នះ” ។

លោកប្រធានាធិបតីបញ្ជាក់ថា “ការសម្រេចចិត្តរបស់រុស្ស៊ីលើការកែនទ័ពគឺជាការទទួលស្គាល់ដោយស្មោះត្រង់ថា កងទ័ពធម្មតារបស់ពួកគេដែលត្រូវបានរៀបចំអស់ជាច្រើនទសវត្សរ៍ដើម្បីកាន់កាប់ប្រទេសផ្សេងនោះ មិនបានសម្រេចនោះទេ ហើយកំពុងដួលរលំ” ។

លោក Zelensky សង្កត់ធ្ងន់ថា ឥឡូវនេះដោយសារតែការកែនទ័ព សង្គ្រាមរបស់រុស្ស៊ីប្រឆាំងនឹងអ៊ុយក្រែនសម្រាប់ពលរដ្ឋរុស្ស៊ីភាគច្រើនមិនមែនជារឿងនៅលើទូរទស្សន៍ ឬតាមអ៊ីនធឺណិតនោះទេ ប៉ុន្តែជាអ្វីមួយដែលបានចូលគ្រប់ផ្ទះរបស់ពលរដ្ឋរុស្ស៊ីហើយ ។

គួរបញ្ជាក់ថា កាលពីថ្ងៃពុធប្រធានាធិបតីរុស្ស៊ីលោក វ្ល៉ាឌីមៀរ ពូទីន បានប្រកាសពីការកែនទ័ពមួយផ្នែកនៅក្នុងប្រទេស ដែលនឹងប៉ះពាល់ដល់មនុស្សប្រហែល ៣០០,០០០ នាក់ដែលមានអាយុចន្លោះពី ១៨ ទៅ ៥០ ឆ្នាំ ហើយពួកគេទាំងនោះបានសម្រុកចាកចេញពីប្រទេសផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ អ៊ុយក្រែន​ បណ្ដេញ​ឯកអគ្គរដ្ឋទូត​ អ៊ីរ៉ង់