ព័ត៌មានអន្ដរជាតិ

សមយុទ្ធយោធារួម អាមេរិក-កូរ៉េខាងត្បូង មានទាំងនាវាដើរដោយថាមពលនុយក្លេអ៊ែរ

បានផុស

២ years មុន

នៅ

ថ្ងៃចន្ទ ២៦ កញ្ញា ២០២២

ដោយ

សហរដ្ឋអាមេរិក និងកូរ៉េខាងត្បូង គ្រោងនឹងចាប់ផ្តើមធ្វើសមយុទ្ធយោធារួមគ្នានៅសមុទ្រជប៉ុននាថ្ងៃនេះ ដោយមានការចូលរួមពីនាវាផ្ទុកយន្តហោះ ដើរដោយថាមពលនុយក្លេអ៊ែរ។

ក្រុមនាវា USS Ronald Reagan រួមមាននាវាផ្ទុកយន្តហោះថ្នាក់ Nimitz, នាវាចម្បាំងដឹកកាំជ្រួចមីស៊ីល USS Chancellorsville និងនាវាពិឃាត USS Barry Arleigh Burke-class បានចូលចតនៅមូលដ្ឋានទ័ពជើងទឹកក្នុងទីក្រុង Busan ចម្ងាយប្រហែល ៣៩០ គីឡូម៉ែត្រភាគអាគ្នេយ៍នៃរដ្ឋធានីសេអ៊ូលនៅវេលាម៉ោងប្រមាណ ៩ ព្រឹក (ម៉ោងនៅកូរ៉េខាងត្បូងកាលពីម្សិលមិញ) ហើយនឹងបន្តធ្វើ រហូតដល់ថ្ងៃព្រហស្បតិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមគ្នានេះដែរ រដ្ឋាភិបាលកូរ៉េខាងត្បូងបានសង្កត់ធ្ងន់ថា ទីក្រុងសេអ៊ូល និងទីក្រុងវ៉ាស៊ីនតោន នឹងពង្រឹងសមត្ថភាពការពាររួមគ្នារបស់ពួកគេ និងបញ្ជាក់ឡើងវិញនូវការប្តេជ្ញាចិត្តដ៏រឹងមាំ ដើម្បីបន្សាបរាល់ទម្រង់នៃការបង្កហេតុដោយទីក្រុងព្យុងយ៉ាង។ ចំណែកឯកូរ៉េខាងជើងបានរិះគន់កូរ៉េខាងត្បូង ដែលបានធ្វើការជាមួយអាមេរិក ហើយនិយាយនៅលើគេហទំព័ររដ្ឋនៅថ្ងៃអាទិត្យនេះថា ផែនការសម្រាប់ការបង្កហេតុសង្រ្គាម នឹងបង្កើតតែការបំផ្លិចបំផ្លាញដ៏គួរឲ្យខ្លាចប៉ុណ្ណោះ។

ជាមួយគ្នានេះដែរ កូរ៉េខាងជើងនៅថ្ងៃដដែលនេះ បានបាញ់បង្ហោះកាំជ្រួចផ្លោងរយៈចម្ងាយខ្លីឆ្ពោះទៅកាន់សមុទ្រជប៉ុន ពីតំបន់មួយក្នុង ឬជុំវិញទីក្រុង Taechon ខេត្ត Phyongan ខាងជើង។ កាំជ្រួចត្រូវបានគេប៉ាន់ប្រមាណថា បានធ្លាក់នៅក្រៅតំបន់សេដ្ឋកិច្ចផ្តាច់មុខរបស់ជប៉ុន។ ចំណែកទីក្រុងវ៉ាស៊ីនតោន និងសេអ៊ូល នៅតែស្ថិតក្នុងការប្រុងប្រយ័ត្ន ចំពោះការបាញ់មីស៊ីលបន្ថែមទៀត និងការបង្កហេតុផ្សេងទៀតដោយទីក្រុងព្យុងយ៉ាង ខណៈដែលកូរ៉េខាងជើងត្រូវបានគេរំពឹងថា នឹងមានប្រតិកម្មយ៉ាងខ្លាំង ចំពោះសមយុទ្ធរួមគ្នារវាងសហរដ្ឋអាមេរិក និងកូរ៉េខាងត្បូង៕

ប្រែសម្រួល៖ សាង ស្រីល័ក្ខ

ប្រភព៖ NHK

ចុចអាន៖នាវាផ្ទុកយន្តហោះ អាមេរិក មកដល់ កូរ៉េខាងត្បូង ហើយ ត្រៀមធ្វើសមយុទ្ធរួមគ្នាចុងខែនេះ