ថៃ ព្រមានឲ្យប្រុងជើងការ ខណៈព្យុះទីហ្វុង Noru ខិតជិតមកដល់

ព្យុះទីហ្វុង Noru ដែលកំពុងបក់បោកនៅហ្វីលីភីន នឹងធ្វើដំណើរឆ្ពោះ​ទៅ​កាន់​​វៀតណាម ហើយ​នាំមកនូវភ្លៀងធ្លាក់ខ្លាំងដល់តំបន់ភាគច្រើន​នៃ​ប្រទេសថៃ ខណៈនាយកដ្ឋានឧតុនិយម​ព្រមាន​ឲ្យ​ប្រុង​ជើងការ។

នាយកដ្ឋានឧតុនិយមថៃ បានចេញការព្រមានដោយនិយាយថា ព្យុះទីហ្វុង Noru កំពុង​ធ្វើ​ដំណើរ​ឆ្ពោះ​ទៅ​ទិស​ខាង​លិច ពីកណ្តាលសមុទ្រចិនខាងត្បូង ​បន្ទាប់ពីបានបកបោក​ដីគោក​នៅ​ប្រទេស​ហ្វីលីពីន។ វាត្រូវបានគេរំពឹងថា ​នឹងវាយលុក​ប្រទេសវៀតណាម​នៅ​ថ្ងៃពុធសប្ដាហ៍នេះ។

ព្យុះទីហ្វុងដ៏ខ្លាំងក្លា​នេះ រួមជាមួយនឹងខ្យល់មូសុង​ដែលកំពុងតែពង្រឹង​លើសមុទ្រ Andaman និង​ឈូង​សមុទ្រថៃ ហើយនាំមកនូវភ្លៀងធ្លាក់ខ្លាំងដល់ភាគខាងជើង ភាគឦសាន តំបន់​កណ្តាល រួមទាំងទីក្រុងបាងកក ភាគខាងកើត និងភាគខាងត្បូង ចាប់ពីថ្ងៃពុធ ដល់​ថ្ងៃសៅរ៍ផងដែរ។

ប្រជាពលរដ្ឋនៅតំបន់ទាំងនេះ ត្រូវបានព្រមាន​ពីទឹកជំនន់ភ្លាមៗ និងការហូរហៀរ ជាពិសេស​នៅ​តាម​ដង​ផ្លូវ​ទឹក​នៅជិត​ជើងភ្នំ និង​តំបន់​ទំនាប ហើយ​ត្រូវ​បានណែនាំឲ្យ​តាមដាន​ព័ត៌មាន​អាកាសធាតុ។ ក្រសួងក៏បានព្យាករណ៍ថា រលក​កម្ពស់​ពី ២ ទៅ ៣ ម៉ែត្រ ចាប់ពីថ្ងៃអង្គារ ដល់ថ្ងៃសៅរ៍ នៅ​សមុទ្រ Andaman និងឈូងសមុទ្រភាគខាងលិច ដែលនឹងមានភ្លៀងធ្លាក់ខ្លាំង។ រលក​នៅ​ឈូង​សមុទ្រ​ខាង​ក្រោម​ នឹង​មាន​កម្ពស់​ប្រហែល​២​ម៉ែត្រ និង​មាន​ភ្លៀង​ធ្លាក់​ខ្លាំង​ជាង​នេះ។ កប៉ាល់ត្រូវបានណែនាំឲ្យ​បន្តការប្រុងប្រយ័ត្ន ខណៈដែលទូកតូចៗនៅសមុទ្រ Andaman និងឈូងសមុទ្រខាងលើ​ត្រូវបានប្រាប់ឲ្យ​ស្នាក់​នៅលើច្រាំង​ដើម្បី​សុវត្ថិភាព៕

ប្រែសម្រួល៖ សាង ស្រីល័ក្ខ

ប្រភព៖Nationthailand

ចុចអាន៖ព្យុះទីហ្វុង Noru កំពុងឆក់យកជីវិតមនុស្សនៅ ហ្វីលីពីន ខណៈជើងហោះហើរ និងសាលារៀនត្រូវបិទបន្ទាន់