កូរ៉េខាងត្បូង បង្ហើបពេលវេលាដែល កូរ៉េខាងជើង ទំនងជាបាញ់នុយក្លេអ៊ែរ (មានវីដេអូ)

ដោយដកស្រង់ប្រភពពីទីភ្នាក់ងារចារកម្មជាតិ, សារព័ត៌មាន Yonhap របស់កូរ៉េខាងត្បូងបានរាយការណ៍នៅថ្ងៃពុធទី២៨ខែកញ្ញានេះថា ការសាកល្បងនុយក្លេអ៊ែរលើកដំបូងរបស់កូរ៉េខាងជើងចាប់តាំងពីឆ្នាំ២០១៧មក ទំនងជាកើតឡើងនៅចន្លោះថ្ងៃទី១៦ខែតុលា ដល់ថ្ងៃទី៧ខែវិច្ឆិកាឆ្នាំ២០២២។

ទីភ្នាក់ងារសារព័ត៌មាននេះរាយការណ៍ថា ការត្រៀមលក្ខណៈសម្រាប់ការសាកល្បងនុយក្លេអ៊ែរ គឺរួចរាល់អស់ហើយនៅកន្លែងធ្វើតេស្តក្រោមដី Punggye-ri របស់ប្រទេសកូរ៉េខាងជើង។

នោះគឺជាកន្លែងដែលទីក្រុង ព្យុងយ៉ាង បានធ្វើការសាកល្បងនុយក្លេអ៊ែរក្រោមដីចំនួន៦លើកចាប់ពីឆ្នាំ២០០៦ ដល់ឆ្នាំ២០១៧។

យោងតាម Yonhap, ពេលវេលានៃការធ្វើតេស្តនេះ ទំនងជាត្រូវបានកំណត់ចំពេលព្រឹត្តិការណ៍នៅក្នុងប្រទេសជាសម្ព័ន្ធមិត្តដ៏សំខាន់របស់កូរ៉េខាងជើង គឺចិន និងគូប្រជែងដ៏ធំបំផុតរបស់ខ្លួន គឺសហរដ្ឋអាមេរិក។

សមាជិកសភាឈ្មោះ Yoo Sang-bum បានប្រាប់ Yonhap ថា “ទីភ្នាក់ងារចារកម្មជាតិបាននិយាយថា ប្រសិនបើកូរ៉េខាងជើងធ្វើការសាកល្បងនុយក្លេអ៊ែរមែននោះ វាអាចនៅចន្លោះពេលនៃសមាជបក្សលើកទី២០របស់ប្រទេសចិននៅថ្ងៃទី១៦ខែតុលា និងការបោះឆ្នោតពាក់កណ្តាលអាណត្តិអាមេរិក នៅថ្ងៃទី៧ខែវិច្ឆិកា”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Reuters

ចុចអាន៖ កូរ៉េខាងជើង អនុម័តច្បាប់ថ្មី អាចបាញ់អាវុធនុយក្លេអ៊ែរ ដោយស្វ័យប្រវត្តិ