តុលាការមីយ៉ាន់ម៉ារកឃើញករណីថ្មីលើលោកស្រី អ៊ុងសាន ស៊ូជី និងកាត់​ទោសឲ្យជាប់ពន្ធនាគារ ៣ ឆ្នាំទៀត

មេដឹកនាំជាប់ឆ្នោតរបស់មីយ៉ាន់ម៉ាលោកស្រី អ៊ុងសាន ស៊ូជី ត្រូវបានរកឃើញថាមានពិរុទ្ធពីបទរំលោភលើច្បាប់សន្តិសុខសម្ងាត់រដ្ឋ និងត្រូវបានតុលាការមីយ៉ាន់ម៉ាកាត់ទោសឲ្យជាប់ពន្ធនាគាររយៈពេល ៣ ឆ្នាំ ។

មន្ត្រីម្នាក់ដែលបាននិយាយក្នុងលក្ខខណ្ឌមិនបញ្ចេញឈ្មោះបានប្រាប់ទីភ្នាក់ងារសារព័ត៌មាន AP ថា ក្រៅពីលោកស្រី អ៊ុងសាន ស៊ូជី ក្នុងនោះទីប្រឹក្សាសេដ្ឋកិច្ចរបស់លោកស្រីគឺលោក Sean Turnell ដែលជាជនជាតិអូស្ត្រាលីក៏ត្រូវបានគេរកឃើញថាមានពិរុទ្ធផងដែរ ហើយត្រូវបានកាត់ទោសឲ្យជាប់ពន្ធនាគាររយៈពេល ៣ ឆ្នាំដូចគ្នា ។

ទោះយ៉ាងណាទាំងលោកស្រី ស៊ូជី និងលោក Turnell ដែលសុទ្ធតែ​មាន​អាយុ ៧៧ ឆ្នាំ​បាន​បដិសេធ​ការ​ចោទ​ប្រកាន់​ក្នុង​រឿង​ក្តី​នេះ ​នៅពេលដែលអ្នកទាំងពីរ​ផ្តល់​សក្ខីកម្ម​កាលពី​ខែ​សីហាកន្លងទៅ ។

គួរបញ្ជាក់ថា កន្លងមកអ្នកស្រី អ៊ុងសាន ស៊ូជី ត្រូវបានតុលាការមីយ៉ាន់ម៉ាកាត់ទោសឲ្យជាប់ពន្ធនាគាររយៈពេល ២០ ឆ្នាំរួចមកហើយនៅក្នុងករណីផ្សេងៗទៀត ដែលត្រូវបានគេមើលឃើញថា យោធាមីយ៉ាន់ម៉ាមានបំណងមិនឲ្យលោកស្រីវិលត្រឡប់មកកាន់អំណាចនៅក្នុងប្រទេសដែលលោកស្រីនៅតែមានប្រជាប្រិយភាពខ្លាំង ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ ជប៉ុន ផ្អាកកម្មវិធីបណ្ដុះបណ្ដាលដល់យោធា មីយ៉ាន់ម៉ា ក្រោយការប្រហារ​ជីវិតសកម្មជនគាំទ្រលទ្ធិប្រជាធិបតេយ្យ