ព្យុះ ណូរុ ឆក់យកជីវិតមនុស្សនៅ ថៃ (មានវីដេអូ)

នាយកដ្ឋានបង្ការ និងកាត់បន្ថយគ្រោះមហន្តរាយថៃ បាននិយាយថា ព្យុះត្រូពិក ណូរុ បានធ្វើឲ្យខេត្តភាគឦសានចំនួន៤ត្រូវលិចលង់ ដោយមានមនុស្សម្នាក់ស្លាប់ និង២នាក់ផ្សេងទៀត រងរបួស។

ព្យុះនេះបានបង្កឲ្យមានការប្រកាសអាសន្នក្នុងខេត្តចំនួន ១៧ នៅភាគខាងជើង ឦសាន និងវាលទំនាបកណ្តាល ដែលសុទ្ធតែប្រឈមនឹងហានិភ័យនៃទឹកជំនន់ធ្ងន់ធ្ងរនារយៈពេលប៉ុន្មានថ្ងៃខាងមុខ។

សេចក្តីប្រកាសព័ត៌មានរបស់នាយកដ្ឋាន បានឲ្យដឹងថា ចាប់ពីយប់ថ្ងៃពុធ រហូតដល់ព្រឹកថ្ងៃព្រហស្បតិ៍ ភាគច្រើននៃខេត្ត Amnat Charoen, Si Saket, Yasothon និង Ubon Ratchathani បានជួបប្រទះនូវជំនន់ទឹកភ្លៀង និងផ្គររន្ទះឥតឈប់ឈរ។

នាយកដ្ឋានបន្តថា ផ្លូវសំខាន់ៗជាច្រើននៅក្នុងខេត្តទាំងនេះ ត្រូវបានទឹកជន់លិច មិនអាចឆ្លងកាត់បាន។ ខ្យល់បក់បោកខ្លាំងបានផ្តួលរំលំដើមឈើនៅតាមផ្លូវ និងបង្កការកកស្ទះដល់ផ្លូវដឹកជញ្ជូនសាធារណៈនៅក្នុងស្រុកចំនួន ៥ទូទាំងខេត្តចំនួន៤។

ក្នុងខេត្ត Si Saket មនុស្សម្នាក់បានស្លាប់ និង២នាក់ទៀតរងរបួស នៅពេលដើមឈើដ៏ធំមួយបានបាក់សង្កត់លើរថយន្តដែលពួកគាត់កំពុងធ្វើដំណើរ។

ខេត្ត Ubon Ratchathani បានកត់ត្រាកម្រិតទឹកភ្លៀងធ្លាក់លើសពី ១០០ មិល្លីម៉ែត្រ ចាប់ពីយប់ថ្ងៃពុធ រហូតដល់ព្រឹកថ្ងៃព្រហស្បតិ៍ នៅគ្រប់ស្រុកទាំងអស់ ខណៈកម្រិតទឹកនៅក្នុងទន្លេ Mun នឹងកើនឡើងពីមួយទៅពីរម៉ែត្រ។

គ្រួសារសរុប ១៥១៨ ក្នុងសហគមន៍ចំនួន ៤៦ ក្នុងខេត្តភាគឦសាន ត្រូវបានជម្លៀសទៅកាន់ទីទួលសុវត្ថិភាពរួចទៅហើយ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Bangkok Post

ចុចអាន៖ វៀតណាម បញ្ចេញតួលេខជនរងគ្រោះ និងទំហំនៃការខូចខាតដែលបង្កឡើងដោយព្យុះ ណូរុ