បំផ្ទុះគ្រាប់បែកអត្តឃាត ពេល​សិស្សកំពុង​ប្រលងនៅ អាហ្វហ្គានីស្ថាន ស្លាប់មនុស្ស ១៩នាក់

ការបំផ្ទុះគ្រាប់បែកអត្តឃាត នៅមជ្ឈមណ្ឌលអប់រំមួយកន្លែងក្នុងទីក្រុងកាប៊ុល បានសម្លាប់មនុស្សយ៉ាងតិច ១៩នាក់ ភាគច្រើនត្រូវបានគេជឿថាជាស្ត្រីវ័យក្មេង ដែលនេះគូសបញ្ជាក់ពីស្ថានភាពសន្តិសុខកាន់តែយ៉ាប់យ៉ឺន ក្នុងរដ្ឋធានីអាហ្វហ្គានីស្ថាន។

ការផ្ទុះ បានកើតឡើងនៅមជ្ឈមណ្ឌលអប់រំ Kaaj ក្នុងសង្កាត់ Hazara ដែលជាតំបន់សម្បូរជនជាតិភាគតិច ហើយបានប្រឈមមុខនឹងការគាបសង្កត់ជាយូរមកហើយ។

សិស្សានុសិស្ស ​កំពុង​ប្រលង​ចូល​សកលវិទ្យាល័យ ​នៅម៉ោង ៧ និង ៣០ នាទី​ព្រឹក​ថ្ងៃ​សុក្រ​ នៅពេល​ការ​ផ្ទុះ​បាន​កើត​ឡើង។ អ្នកនាំពាក្យ​ប៉ូលិស​ក្រុង​កាប៊ុល លោក Khalid Zadran បាន​ប្រាប់ CNN ​ថា មនុស្ស​យ៉ាង​តិច ១៩ នាក់​បាន​ស្លាប់ និង ២៧ នាក់​ផ្សេង​ទៀត​រង​របួស។

ទោះបីជាយ៉ាងណាក៏ដោយ មិនទាន់មានការអះអាងទទួលខុសត្រូវចំពោះការវាយប្រហារនេះនៅឡើយទេ។

គួរបញ្ជាក់ថា ការវាយប្រហារជាបន្តបន្ទាប់ក្នុងទីក្រុងកាប៊ុល បានឆក់យកជីវិតមនុស្សរាប់សិបនាក់ក្នុងរយៈពេលប៉ុន្មានសប្តាហ៍ថ្មីៗនេះ។

កាលពីដើមខែនេះ បុគ្គលិកស្ថានទូតរុស្ស៊ីពីរនាក់ ស្ថិតក្នុងចំណោមមនុស្ស ៦ នាក់ ដែលត្រូវបានសម្លាប់ក្នុងការបំផ្ទុះអត្តឃាតជិតស្ថានទូតរុស្ស៊ី ហើយកាលពីខែសីហា ការផ្ទុះនៅវិហារឥស្លាមអំឡុងការអធិស្ឋានពេលល្ងាច បានសម្លាប់មនុស្ស ២១ នាក់ និង ៣៣ នាក់ទៀតរងរបួស៕

ប្រែសម្រួល៖ Vann Vann

ប្រភព៖ CNN

ចុចអាន៖ មេដឹកនាំក្រុមអាល់កៃដា ត្រូវអាមេរិកសម្លាប់ ក្នុងការវាយប្រហារដោយយន្តហោះគ្មានមនុស្សបើក