ថៃ ប្រកាសស្រុកមួយក្នុងខេត្តភាគកណ្ដាល កំពុងស្ថិតក្រោមទឹកជំនន់

រដ្ឋបាលខេត្ត Pathum Thani ភាគកណ្ដាលប្រទេសថៃបានប្រកាសស្រុក Sam Khok ជាតំបន់គ្រោះមហន្តរាយទឹកជំនន់ ដោយសារតែស្រុកទាំងមូលស្ថិតនៅក្រោមទឹក ក្រោយការហូរហៀរចេញពីទឹកទន្លេចៅប្រាយ៉ា ។

បច្ចុប្បន្នគ្រួសារជាង ៥,០០០ នៅក្នុងស្រុក Sam Khok កំពុងរងការជន់លិចដោយទឹកជំនន់ ហើយអ្នកស្រុកជាច្រើនកំពុងប្រើប្រាស់ទូកក្នុងការធ្វើដំណើរពីផ្ទះរបស់ពួកគេទៅកាន់ផ្លូវនៅទីទួលខ្ពស់ដែលមិនទាន់លិចលង់នៅឡើយ ។

ទន្ទឹមនោះ អភិបាលខេត្តលោក Narongsak Osottanakorn បាននិយាយថា ឧបករណ៍សង្គ្រោះជាច្រើនត្រូវបានមន្ត្រីចែកជូនដល់ជនរងគ្រោះដោយទឹកជំនន់ ខណៈបាវខ្សាច់ក៏ត្រូវបានផ្តល់ជូនសម្រាប់ទប់ការពារទឹកចេញពីទំនប់ផងដែរ ។

បន្ថែមពីនេះប្រជាពលរដ្ឋម្នាក់រស់នៅឃុំ Bang Toey ស្រុក Sam Khok បានឲ្យដឹងថា គាត់បានចេញពីផ្ទះនៅម៉ោងប្រហែល ៧ ព្រឹកថ្ងៃសៅរ៍ ហើយនៅពេលដែលត្រឡប់មកវិញប្រហែល ២ ម៉ោងល្ងាច ទឹកបានហក់ឡើងយ៉ាងខ្លាំង ហើយគាត់មិនអាចយកឡានចេញពីផ្ទះបានទេ ។

ដោយឡែកអ្នកស្រុកផ្សេងទៀតបាននិយាយថា ទឹកជំនន់ក៏ធ្លាប់លិចលង់ក្នុងសហគមន៍របស់ពួកគេផងដែរ ប៉ុន្តែកម្ពស់ទឹកលើកនេះបានឡើងយ៉ាងឆាប់រហ័ស បន្ទាប់ពីទឹកបានហូរច្រោះតាមទ្វារទឹកក្នុងស្រុក Bang Sai នៃខេត្តអាយុធ្យា ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ រត់ជាន់គ្នាស្លាប់ជាង ១២៩ នាក់ក្នុងការប្រកួតបាល់ទាត់នៅ ឥណ្ឌូណេស៊ី