ព័ត៌មានអន្ដរជាតិ

រុស្ស៊ី ដកទ័ពចេញពីទីក្រុងភាគខាងកើត អ៊ុយក្រែន

បានផុស

២ years មុន

នៅ

ថ្ងៃអាទិត្យ ២ តុលា ២០២២

ដោយ

ក្រសួងការពារជាតិរុស្ស៊ីបានប្រកាសកាលពីថ្ងៃសៅរ៍ថា កងទ័ពរុស្ស៊ីបានដកចេញពីបន្ទាយដ៏សំខាន់ក្នុងទីក្រុង Lyman ដែលមានទីតាំងនៅតំបន់ Donetsk ភាគខាងកើតអ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសដកទ័ពនេះកើតឡើងតែមួយថ្ងៃប៉ុណ្ណោះ បន្ទាប់ពីលោកប្រធានាធិបតី វ្ល៉ាឌីមៀរ ពូទីន បានបញ្ចូលជាឯកតោភាគីលើតំបន់ចំនួន ៤ នៅភាគខាងកើត និងខាងត្បូងអ៊ុយក្រែន រួមទាំងតំបន់ Donetsk ផងដែរ ។

ក្រសួងបាននិយាយថា ការដកទ័ពរបស់ខ្លួនគឺដើម្បីចល័តទៅកាន់តំបន់ដែលរឹងមាំ និងការការពារប្រសើរជាងនេះ ក៏ដូចជាដើម្បីបញ្ចៀសការគំរាមកំហែងពីការឡោមព័ទ្ធណាមួយដោយកងកម្លាំងអ៊ុយក្រែន ។

ទន្ទឹមនឹងនេះ យោធាអ៊ុយក្រែនក៏បាននិយាយកាលពីថ្ងៃសៅរ៍ដែរថា កងទ័ពរបស់ខ្លួនកំពុងបិទនៅកណ្តាលទីក្រុង Lyman ដើម្បីវាយដណ្តើមយកទីក្រុងនេះមកវិញ នៅពេលនេះដែលកងកម្លាំងរបស់រុស្ស៊ីបានចាកចេញទាំងស្រុង ។

កងទ័ពអ៊ុយក្រែនក៏ត្រូវបានគេរំពឹងថា នឹងបង្កើនការវាយលុករបស់ពួកគេក្នុងកិច្ចខិតខំប្រឹងប្រែងដើម្បីព្យាយាមដណ្តើមយកមកវិញនូវមូលដ្ឋានរឹងមាំរបស់រុស្ស៊ីផ្សេងទៀតនៅសាធារណរដ្ឋ Donetsk និង Luhansk ដែលនៅជិតខាងគ្នា ។

គួរបញ្ជាក់ថា ទីក្រុង Lyman បានបម្រើការជាផ្លូវដែក និងមជ្ឈមណ្ឌលដឹកជញ្ជូនដ៏សំខាន់នៅក្នុងទីក្រុង Donetsk សម្រាប់កងកម្លាំងរបស់រុស្ស៊ី ចាប់តាំងពីពួកគេបានដណ្តើមយកទីក្រុងនេះកាលពីខែឧសភា ជាពិសេសកងកម្លាំងរុស្ស៊ីបានប្រើវាជាមូលដ្ឋានដើម្បីឈានទៅកាន់តំបន់ផ្សេងទៀតក្នុងតំបន់ Donbas ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក Zelensky ឲ្យប្រជាជននៅតំបន់មួយរបស់ រុស្ស៊ី ប្រយុទ្ធដើម្បីបញ្ចៀសការស្លាប់