អ្នកស្លាប់ដោយសារព្យុះសង្ឃរា Ian នៅរដ្ឋ Florida កើនដល់ជិត ១០០នាក់ (មានវីដេអូ)

ចំនួនអ្នកស្លាប់ដោយសារព្យុះសង្ឃរា Ian បានកើនឡើងដល់ជាង ៩០នាក់ហើយ នៅក្នុងរដ្ឋ Florida ខណៈបុគ្គលិកជួយសង្គ្រោះ បន្តស្វែងរកអ្នកនៅរស់រានមានជីវិត។

មន្ត្រីក្នុងរដ្ឋ Florida បានរងការរិះគន់យ៉ាងចាស់ដៃ ខណៈមានការចោទប្រកាន់ថា ប្រជាពលរដ្ឋនៅក្នុងតំបន់ដែលរងគ្រោះខ្លាំងមួយចំនួន មិនបានទទួលការព្រមានជាមុនគ្រប់គ្រាន់ដើម្បីជម្លៀសចេញនោះទេ។

គិតត្រឹមពេលនេះ សឹងតែកណ្តាលនៃអ្នកស្លាប់ គឺស្ថិតនៅក្នុងតំបន់ Lee ជាកន្លែងដែលព្យុះ Ian បានបង្កឲ្យមានការបាក់ដី ក្នុងនាមជាព្យុះសង្ឃរាប្រភេទ៤។

លោកប្រធានាធិបតី Joe Biden ត្រូវបានគេរំពឹងថា នឹងចុះទៅរដ្ឋ Florida នៅថ្ងៃពុធ។

កាល​ពី​ថ្ងៃ​ចន្ទ លោក Biden បាន​ធ្វើដំណើរ​ទៅ​កោះ​ព័រតូរីកូ ដោយនៅទីនោះ ​លោក​បាន​សន្យា​ផ្តល់​ជំនួយ​ចំនួន ៦០លាន​ដុល្លារ ដើម្បី​ជួយដល់​ទឹកដី​របស់អាមេរិកមួយនេះ។

យោងតាមសារព័ត៌មាន CBS, ចំនួនអ្នកស្លាប់ដោយសារខ្យល់ព្យុះនៅរដ្ឋ Florida បានកើនឡើងដល់ ៩៤នាក់ គិតត្រឹមរសៀលថ្ងៃចន្ទទី០៣ខែតុលា។ ការស្លាប់មនុស្សបួននាក់ផ្សេងទៀត ត្រូវបានបញ្ជាក់នៅក្នុងរដ្ឋ North Carolina។

ថ្វីបើចំនួនអ្នកស្លាប់ដោយសារព្យុះ Ian បានធ្វើឲ្យវាក្លាយជាព្យុះសង្ឃរាសម្លាប់មនុស្សច្រើនបំផុតមួយនៅក្នុងប្រវត្តិសាស្រ្តសម័យថ្មីក៏ដោយ ប៉ុន្តែព្យុះនេះនៅតែជះឥទ្ធិពលស្រាលជាង បើប្រៀបធៀបទៅនឹងព្យុះសង្ឃរា Katrina ឆ្នាំ ២០០៥ ដែលបានសម្លាប់មនុស្សជាង ១៨០០ នាក់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ព្យុះសង្ឃរា Ian សម្លាប់មនុស្សជាង ៧០ នាក់ហើយនៅ អាមេរិក