ពូទីន ចុះហត្ថលេខា ដាក់បញ្ចូលអតីតតំបន់អ៊ុយក្រែនចំនួន ៤ ជាទឹកដីរបស់រុស្ស៊ី ជាផ្លូវការ (មានវីដេអូ)

នៅថ្ងៃពុធទី០៤ខែតុលា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានចុះហត្ថលេខាលើច្បាប់រដ្ឋធម្មនុញ្ញ ដែលធ្វើឲ្យតំបន់ Donetsk, Luhansk, Zaporizhzhia និង Kherson ក្លាយជាផ្នែករបស់ប្រទេសរុស្ស៊ីជាផ្លូវការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុននេះ សន្ធិសញ្ញាត្រូវបានអនុម័តដោយសភាទាំងពីររបស់រុស្ស៊ី ក៏ដូចជាដោយស្ថាប័ននីតិប្បញ្ញត្តិរបស់តំបន់ Donetsk និង Luhansk ផងដែរ។

ប្រជាមតិស្តីពីការចូលរួមជាមួយរុស្ស៊ី បានចាប់ផ្តើមក្នុងពេលដំណាលគ្នាកាលពីថ្ងៃទី២៣ខែកញ្ញានៅក្នុងតំបន់ Donetsk, Luhansk, Zaporizhzhia និង Kherson ហើយបានបញ្ចប់នៅថ្ងៃទី ២៧ខែកញ្ញា។

តំបន់ Donetsk និង Luhansk បានបំបែកចេញពីអ៊ុយក្រែនក្នុងឆ្នាំ ២០១៤ បន្ទាប់ពីរដ្ឋប្រហារ Maidan និងជម្លោះស៊ីវិលនៅភាគខាងកើតប្រទេស។ ភ្លាមៗបន្ទាប់ពីចាប់ផ្តើមប្រតិបត្តិការយោធាក្នុងខែកុម្ភៈឆ្នាំនេះ រុស្ស៊ីបានដណ្តើមយកតំបន់ Kherson និងផ្នែកដ៏ធំនៃតំបន់ Zaporozhye ។

រុស្ស៊ីបានបញ្ជូនកងទ័ពចូលទៅក្នុងប្រទេសអ៊ុយក្រែននៅថ្ងៃទី ២៤ ខែកុម្ភៈ ដោយលើកឡើងពីការបរាជ័យរបស់ទីក្រុងកៀវ ក្នុងការអនុវត្តកិច្ចព្រមព្រៀង Minsk ដែលត្រូវបានរចនាឡើងដើម្បីផ្តល់ឲ្យតំបន់ Donetsk និង Lugansk នូវឋានៈពិសេសនៅក្នុងរដ្ឋអ៊ុយក្រែន។

ពិធីសារដែលសម្របសម្រួលដោយអាល្លឺម៉ង់ និងបារាំង ត្រូវបានចុះហត្ថលេខាជាលើកដំបូងនៅក្នុងឆ្នាំ ២០១៤។ ចាប់តាំងពីពេលនោះមក អតីតប្រធានាធិបតីអ៊ុយក្រែន លោក Pyotr Poroshenko បានទទួលស្គាល់ថា គោលដៅចម្បងរបស់ទីក្រុងកៀវ គឺប្រើប្រាស់បទឈប់បាញ់ដើម្បីទិញពេលវេលា និង បង្កើតកងកម្លាំងប្រដាប់អាវុធដ៏មានឥទ្ធិពល។

នៅខែកុម្ភៈ ឆ្នាំ ២០២២ វិមានក្រឹមឡាំងបានទទួលស្គាល់សាធារណរដ្ឋ Donbass ជារដ្ឋឯករាជ្យ ហើយទាមទារឲ្យអ៊ុយក្រែនប្រកាសជាផ្លូវការថា ខ្លួនជាប្រទេសអព្យាក្រឹត ដែលមិនចូលរួមក្នុងប្លុកយោធាលោកខាងលិចណាមួយឡើយ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sputnik, RT

ចុចអាន៖ អ៊ុយក្រែន រំដោះបានភូមិសំខាន់ៗ ក្នុងតំបន់ ដែលរុស្ស៊ី ទើបកាត់យក