តើ សហរដ្ឋអាមេរិក ជំពាក់បំណុលប្រទេសណា ច្រើនជាងគេ?

កាលពីថ្ងៃអង្គារទី០៣ខែតុលា ក្រសួងរតនាគារអាមេរិកបានបញ្ជាក់ថា បំណុលជាតិរបស់សហរដ្ឋអាមេរិក បានកើនលើស ៣១ទ្រីលានដុល្លារជាលើកដំបូងក្នុងប្រវត្តិសាស្ត្រ។

រដ្ឋាភិបាលអាមេរិក ជំពាក់បំណុលសរុប ៣១,១២៣,៨៨៧,៧៨១,៤០១ និង៣៤សេន គិតត្រឹមថ្ងៃទី៣ខែតុលាឆ្នាំ២០២២។ នេះបើយោងតាមតួលេខរតនាគារ ដែលបានចេញផ្សាយជាសាធារណៈ។

នៅពេលនៃការចូលកាន់តំណែងរបស់លោកប្រធានាធិបតី Joe Biden ក្នុងខែមករា ឆ្នាំ ២០២១ បំណុលមានចំនួន ២៧.៧៥ទ្រីលានដុល្លារ។

ដូច្នេះ តើប្រទេសណាដែលសហរដ្ឋអាមេរិក ជំពាក់បំណុលច្រើនជាងគេ?

យោងតាមការចុះផ្សាយរបស់គេហទំព័រ The Balance Money បានឲ្យដឹងថា គិតត្រឹមខែមិថុនាឆ្នាំ២០២២ ជប៉ុនបានក្លាយជាម្ចាស់បំណុលជាតិធំបំផុតរបស់សហរដ្ឋអាមេរិក ដោយសហរដ្ឋអាមេរិក ជំពាក់បំណុលជប៉ុនចំនួន ១.២៣ទ្រីលានដុល្លារ។

ម្ចាស់បំណុល​ធំ​ទី​ពីរ​គឺ​ប្រទេស​ចិន ដែលសហរដ្ឋអាមេរិក បានជំពាក់ ៩៦៧.៨​ពាន់​លាន​ដុល្លារ​។

តាំងពីឆ្នាំ២០០៦មកម្ល៉េះ ចិន បានចូលមកជំនួសតំណែងចក្រភពអង់គ្លេស ក្នុងនាមជាម្ចាស់បំណុលបរទេសធំជាងគេលំដាប់ទីពីរ ដោយនៅពេលនោះ អាមេរិក បានជំពាក់ចិន ៦៩៩ពាន់លានដុល្លារ។

ចក្រភពអង់គ្លេស គឺជាម្ចាស់បំណុលធំលំដាប់ទី៣ ជាមួយទឹកប្រាក់៦១៥.៤ពាន់លានដុល្លារ។ ម្ចាស់បំណុលទី៤គឺ លុចសំបួ ដែលអាមេរិក ជំពាក់ ៣០៦.៨ពាន់លានដុល្លារ។ បន្ទាប់មកទៀតមានកោះខេមេន, ប្រទេសស្វីស, អៀរឡង់, បែលហ្ស៊ិក, បារាំង និងកោះតៃវ៉ាន់៕

ប្រែសម្រួល៖ Vann Vann

ប្រភព៖ The Balance Money

ចុចអាន៖ អាមេរិក ជំពាក់បំណុលគេច្រើនបំផុត មិនធ្លាប់មាន ក្នុងប្រវត្តិសាស្រ្ត