ខ្មាន់កាំភ្លើង ចូលបាញ់រះក្នុងសាលាក្រុងនៅ ម៉ិកស៊ិក សម្លាប់អភិបាលក្រុង និងមនុស្សច្រើននាក់ទៀត

ប្រព័ន្ធផ្សព្វផ្សាយក្នុងស្រុកបានរាយការណ៍ថា ខ្មាន់កាំភ្លើង បានសម្លាប់អភិបាលក្រុង San Miguel Totolapan នៃរដ្ឋ Guerrero ភាគនិរតីប្រទេសម៉ិកស៊ិក និងសម្លាប់មនុស្សយ៉ាងតិច ៩នាក់ផ្សេងទៀត។

យោងតាមប៉ូលិស, ខ្មាន់កាំភ្លើងបានចូលបាញ់រះក្នុងសាលាក្រុងនៅម៉ោង ១៤:០០ រសៀលថ្ងៃពុធទី០៥ខែតុលា ខណៈរូបថតដែលគេបង្ហោះតាមអ៊ីនធឺណិត បានបង្ហាញពីអគារដែលត្រូវសុសដោយគ្រាប់កាំភ្លើង។

គណបក្ស PRD របស់អភិបាលក្រុងលោក Conrado Mendoza Almeda បានថ្កោលទោសការធ្វើឃាតដ៏កំសាកនេះ និងទាមទាររកយុត្តិធម៌។

ការវាយប្រហារនេះ ត្រូវបានគេស្តីបន្ទោសទៅលើក្រុមឧក្រិដ្ឋជន Los Tequileros។

មន្ត្រីប៉ូលិស និងបុគ្គលិកក្រុមប្រឹក្សា ក៏បាត់បង់ជីវិតផងដែរ នៅក្នុងការសម្លាប់រង្គាលនេះ ហើយមានរបាយការណ៍មួយចំនួនថា ឪពុករបស់លោក Mendoza Almeda គឺអតីតអភិបាលក្រុង Juan Mendoza Acosta ក៏ត្រូវបានសម្លាប់ផងដែរនៅក្នុងផ្ទះរបស់គាត់ មុនពេលកើតហេតុនៅសាលាក្រុង។

ក្រោយ​ការ​វាយ​ប្រហារ ក្រសួង​ការពារ​ជាតិ​បាន​និយាយ​ថា ខ្លួន​បាន​ដាក់​ពង្រាយ​កង​ទ័ព​ទៅ​តំបន់​នោះ ដើម្បី​ស្វែង​រក​ខ្មាន់​កាំភ្លើង។

គួរបញ្ជាក់ថា ក្រុមឧក្រិដ្ឋជនបានបំផ្លិចបំផ្លាញរដ្ឋ Guerrero ចន្លោះឆ្នាំ ២០១៥ ដល់ឆ្នាំ ២០១៧ រហូតដល់មេដឹកនាំរបស់ខ្លួនឈ្មោះ Raybel Jacobo de Almonte ត្រូវបានគេធ្វើឃាត៕

ប្រែសម្រួល៖ Vann Vann

ប្រភព៖ BBC

ចុចអាន៖ សាកសពមនុស្ស១៤នាក់ត្រូវបានប្រទះឃើញតាមចិញ្ចើមផ្លូវក្នុងប្រទេស ម៉ិកស៊ិក