ឥណ្ឌូណេស៊ី ចោទប្រកាន់មនុស្ស ៦នាក់ ពាក់ព័ន្ធហេតុការណ៍រត់ជាន់គ្នាក្នុងកីឡដ្ឋាន (មានវីដេអូ)

មេប៉ូលិសឥណ្ឌូណេស៊ី កាលពីថ្ងៃព្រហស្បតិ៍ទី៦ ខែតុលា បាននិយាយថា មនុស្សចំនួន៦នាក់ ត្រូវបានចោទប្រកាន់ ពាក់ព័ន្ធគ្រោះមហន្តរាយក្នុងកីឡដ្ឋានបាល់ទាត់ ដែលបានសម្លាប់មនុស្សចំនួន ១៣១នាក់ កាលពីចុងសប្តាហ៍មុន។

មេប៉ូលិសជាតិ Listyo Sigit Prabowo បានប្រាប់សន្និសីទសារព័ត៌មានថា “ផ្អែកលើការស៊ើបអង្កេត និងព័ស្ដុតាងគ្រប់គ្រាន់ យើងបានកំណត់ជនសង្ស័យចំនួន ៦នាក់”។

លោកនិយាយថា មនុស្សចំនួន៦នាក់ដែលត្រូវបានចោទប្រកាន់ពីបទធ្វេសប្រហែសបណ្តាលឲ្យមានមនុស្សស្លាប់ រួមមានមន្ត្រីប៉ូលិស៣នាក់ និងមនុស្ស៣នាក់ ដែលទទួលខុសត្រូវចំពោះការប្រកួត និងសន្តិសុខ រួមទាំងប្រធានគណៈកម្មការរៀបចំការប្រកួតរបស់ក្រុមបាល់ទាត់ Arema FC និងមន្ត្រីសន្តិសុខរបស់ក្លិបម្នាក់ផងដែរ។

លោក​បន្ត​ថា មន្ត្រី​ប៉ូលិស២​នាក់​ដែល​ស្ថិត​ក្រោម​ការ​ស៊ើបអង្កេត គឺ​បាន​បញ្ជា​ឲ្យ​សហការី​បាញ់​ឧស្ម័ន​បង្ហូរ​ទឹក​ភ្នែក។ មន្ត្រីប៉ូលីសទី៣ដែលស្ថិតនៅក្រោមការស៊ើបអង្កេត គឺជាអ្នកដឹងអំពីបទប្បញ្ញត្តិសុវត្ថិភាពរបស់ FIFA ដែលហាមប្រាមការប្រើប្រាស់ឧស្ម័នគ្រប់គ្រងហ្វូងមនុស្សនៅទីលាន ប៉ុន្តែមិនបានរារាំងមិត្តរួមការងារ ពីការបាញ់ឧស្ម័នបង្ហូរទឹកភ្នែកនោះទេ។

ជន​សង្ស័យ​ទាំងអស់ អាច​ប្រឈម​នឹង​ការ​ផ្ដន្ទាទោស​ដាក់​ពន្ធនាគារ​អតិបរមា​៥​ឆ្នាំ ប្រសិន​បើ​រក​ឃើញ​ថា​មាន​ទោស។

មុននេះ សមាគមកីឡាបាល់ទាត់ឥណ្ឌូណេស៊ី ក៏បានហាមប្រាមប្រធានគណៈកម្មការរៀបចំការប្រកួតរបស់ក្រុម Arema FC និងមន្ត្រីសន្តិសុខម្នាក់ មិនឲ្យពាក់ព័ន្ធនឹងបាល់ទាត់អស់មួយជីវិតផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ ឥណ្ឌូណេស៊ី ប្រកាសបង្កើតក្រុមស្វែងរកការពិត ករណីរត់ជាន់គ្នាក្នុងកីឡដ្ឋាន បាល់ទាត់