អាមេរិក ចោទមហាអំណាច ២ នេះថាបើកដៃឲ្យ កូរ៉េខាងជើង បាញ់មីស៊ីល

សហរដ្ឋអាមេរិកបានចោទប្រកាន់ប្រទេសចិន និងរុស្ស៊ីថាបើកដៃឲ្យមេដឹកនាំកូរ៉េខាងជើងបាញ់មីស៊ីលផ្លោងផ្ទួនៗ ដោយសារតែការការពារលើទីក្រុងព្យុងយ៉ាងពីការប៉ុនប៉ងបន្ថែមការដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិជុំវិញកម្មវិធីអាវុធនុយក្លេអ៊ែរ និងមីស៊ីលរបស់ខ្លួន ។

ឯកអគ្គរដ្ឋទូតអាមេរិកប្រចាំអង្គការសហប្រជាជាតិ លោកស្រី Linda Thomas-Greenfield បាននិយាយថា “កូរ៉េខាងជើងទទួលបានរនាំងការពារពីសមាជិក ២ រូបនៃក្រុមប្រឹក្សា ហើយបានអនុញ្ញាតិឲ្យលោក គីម ជុងអ៊ុន ធ្វើបែបនេះ” ។

លោកស្រី Linda បញ្ជាក់ថា សមាជិកទាំងពីរនេះបានដើរចេញក្រៅបន្ទាត់ដែលបង្ហាញពីភាពត្រឹមត្រូវរបស់ពួកគេ ហើយបានញុះញង់កូរ៉េខាងជើងម្ដងហើយម្ដងទៀត ជាពិសេសពួកគេបានរារាំងរាល់ការប៉ុនប៉ងងដើម្បីធ្វើបច្ចុប្បន្នភាពនៃការដាក់ទណ្ឌកម្ម” ។

បន្ទាប់ពីកិច្ចប្រជុំនោះ ប្រទេសចំនួន ១១ រួមទាំងប្រទេសជប៉ុន និងសហរដ្ឋអាមេរិក បានចេញសេចក្តីថ្លែងការណ៍រួមមួយ “ថ្កោលទោសយ៉ាងខ្លាំង” ចំពោះការបាញ់មីស៊ីលនេះ ។

សេចក្ដីថ្លែងការណ៍នោះបាននិយាយថា កូរ៉េខាងជើងបានរំលោភលើដំណោះស្រាយជាច្រើនរបស់ក្រុមប្រឹក្សាសន្តិសុខ និងបានគំរាមកំហែងដល់សហគមន៍អន្តរជាតិផងដែរ ។

គួរបញ្ជាក់ថា ការបាញ់មីស៊ីលរបស់កូរ៉េខាងជើងកាលពីថ្ងៃព្រហស្បតិ៍បានកើតឡើងនៅពាក់កណ្តាលនៃកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្ដីអំពីការគំរាមកំហែងកាន់តែខ្លាំងឡើងដែលបង្កឡើងដោយទីក្រុងព្យុងយ៉ាង ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី បង្ហាញលក្ខខណ្ឌ ២ សម្រាប់បន្តកិច្ចចរចាសន្តិភាពនៅ អ៊ុយក្រែន