លោក Zelensky ៖ សង្គ្រាមគួរប្រយុទ្ធតែនៅ អ៊ុយក្រែន បានហើយ កុំឲ្យរាល​ដាលទៅប្រទេសផ្សេង

ប្រធានាធិបតីអ៊ុយក្រែនលោក Volodymyr Zelensky បាននិយាយកាលពីពេលថ្មីៗនេះនៅឯកិច្ចប្រជុំកំពូលនៃសហគមន៍នយោបាយអឺរ៉ុបថា សង្រ្គាមគួរប្រយុទ្ធតែនៅក្នុងប្រទេសអ៊ុយក្រែនបានហើយ ពោលកុំឲ្យវារីករាលដាលដល់ប្រទេសដទៃទៀតអី ។

លោកប្រធានាធិបតីបានគូសបញ្ជាក់ថា អ៊ុយក្រែនមិនដែលចង់ធ្វើសង្រ្គាមនោះទេ ប៉ុន្តែឥឡូវនេះរដ្ឋាភិបាលទីក្រុងកៀវត្រូវបានបង្ខំឲ្យដោះស្រាយជាមួយរុស្ស៊ី ដែលបដិសេធសន្តិភាព និងចង់កែព្រំដែនអឺរ៉ុបឡើងវិញ ។

លោក Zelenskyy បាននិយាយថា អ៊ុយក្រែនគឺជាសមរភូមិដំបូង ហើយចោទប្រកាន់រុស្ស៊ីថាបានសម្លាប់មនុស្សនៅក្នុងទ្វីបអឺរ៉ុប ក៏ដូចជាបង្ខូចតម្លៃអាហារ និងការគំរាមកំហែងនុយក្លេអ៊ែរដើម្បីបំបែកការរួបរួមនៅក្នុងទ្វីបមួយនេះផងដែរ ។

មេដឹកនាំ​អ៊ុយក្រែនរូបនេះ​ក៏​បាន​ជំរុញឲ្យ​បង្កើត​តុលាការ​អន្តរជាតិ​មួយ​ដើម្បី​ផ្តល់​យុត្តិធម៌​សម្រាប់​ឧក្រិដ្ឋកម្ម​សង្រ្គាម និង​ឲ្យ​រុស្ស៊ី​សង​សំណង​សង្រ្គាមផងដែរ ហើយបានសង្កត់ធ្ងន់ថា សង្រ្គាមគួរតែឈ្នះចាញ់នៅអ៊ុយក្រែន ដើម្បីកុំឲ្យមានការវាយប្រហារប្រទេសដទៃទៀត ។

គួរបញ្ជាក់ថា កិច្ចប្រជុំដែលបានរៀបចំនៅរដ្ឋធានី Prague នៃសាធារណរដ្ឋឆេក មានការចូលរួមពីមេដឹកនាំមកពី ៤៤ ប្រទេស ក្នុងនោះមានសមាជិកសហភាពអឺរ៉ុបទាំង ២៧ និងប្រទេសអឺរ៉ុបចំនួន ១៧ រួមទាំងប្រទេសតួកគី ចក្រភពអង់គ្លេស ស៊ែប៊ី និងអ៊ុយក្រែន ជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu