ទីក្រុងនានាទូទាំងប្រទេសអ៊ុយក្រែន កំពុងរងការវាយប្រហារដោយមីស៊ីល យ៉ាងសន្ធឹក

មិនមែនតែរដ្ឋធានី កៀវ ទេ, ការវាយប្រហារដោយមីស៊ីលជាច្រើនគ្រាប់ បានកំណត់គោលដៅលើទីក្រុងនានា ទូទាំងប្រទេសអ៊ុយក្រែន នៅថ្ងៃចន្ទទី១០ខែតុលានេះ។ នេះបើយោងតាមមន្ត្រីក្នុងតំបន់ និងប្រព័ន្ធផ្សព្វផ្សាយ ដែលបានសន្មតថា ការវាយប្រហារនេះ គឺជាស្នាដៃរបស់រុស្ស៊ី។

ការវាយប្រហារនេះកើតឡើងពីរថ្ងៃ បន្ទាប់ពីគ្រាប់បែកបានបំផ្លាញស្ពានយុទ្ធសាស្ត្រគ្រីមៀ ដែលទីក្រុងមូស្គូហៅថា ជាការវាយប្រហារភេរវកម្មរបស់អ៊ុយក្រែន។

ប្រធានាធិបតីអ៊ុយក្រែនលោក Vladimir Zelensky បានគូសបញ្ជាក់ពីការវាយប្រហារលើរដ្ឋធានីកៀវ និងទីក្រុង Dnepr ព្រមទាំងទីក្រុង Zaporozhye មុនពេលជំរុញប្រជាជនឲ្យរកកន្លែងសុវត្ថិភាពលាក់ខ្លួន។ មន្ត្រីក្នុងតំបន់ Lviv, Kharkov និង Odessa ក៏បានរាយការណ៍ថា ទីក្រុងរបស់ពួកគេត្រូវបានភ្លើងឆាបឆេះផងដែរ។

នៅទីក្រុងកៀវ ការខូចខាតពីការវាយប្រហារ ត្រូវបានគេរាយការណ៍នៅជិតទីស្នាក់ការកណ្តាលរបស់សេវាសន្តិសុខអ៊ុយក្រែន (SBU)។

មន្ត្រីក្រុង បានបញ្ឈប់ប្រតិបត្តិការប្រព័ន្ធរថភ្លើងក្រោមដី ហើយស្ថានីយ៍នានាឥឡូវនេះ ត្រូវបានប្រើប្រាស់ជាជម្រកសម្រាប់ជនស៊ីវិល៕

ប្រែសម្រួល៖ Vann Vann

ប្រភព៖ RT

ចុចអាន៖ ការផ្ទុះជាច្រើនលើកកំពុងកើតឡើងនៅកណ្ដាលទីក្រុង កៀវ (មានវីដេអូ)