មានចេតនាធ្វើឲ្យខូចវ៉ាក់សាំងកូវីដ៥០០ដូស បុគ្គលិកម្នាក់ត្រូវបញ្ឈប់ការងារ

ការស៊ើបអង្កេតផ្ទៃក្នុងបានរកឃើញថា បុគ្គលិកម្នាក់បានដកប្រអប់វ៉ាក់សាំងកូវីដរបស់ក្រុមហ៊ុន Moderna ដោយចេតនាចេញពីទូទឹកកករបស់មន្ទីរពេទ្យ Wisconsin ដោយធ្វើឲ្យវ៉ាក់សាំងប្រហែល៥០០ដូសត្រូវខូច។ ឥឡូវនេះ FBI និងប៉ូលិសកំពុងតែធ្វើការស៊ើបអង្កេតលើករណីនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការ Advocate Aurora Health បាននិយាយនៅក្នុងសេចក្តីថ្លែងការណ៍មួយថា “បុគ្គលដែលត្រូវបានសាកសួរនៅថ្ងៃនេះបានសារភាពថា ពួកគេមានចេតនាយកវ៉ាក់សាំងចេញពីទូទឹកកក។ យើងមានការខកចិត្តខ្លាំងណាស់ដែលសកម្មភាពរបស់បុគ្គលរូបនេះនឹងបណ្តាលឲ្យមនុស្សជាង៥០០នាក់ត្រូវពន្យារពេលក្នុងការទទួលបានវ៉ាក់សាំង”។

អង្គការនេះដែលបើកមន្ទីរពេទ្យចំនួន២៦ បាននិយាយថា បុគ្គលិកម្នាក់នេះត្រូវបានគេបណ្តេញចេញពីការងារហើយអាជ្ញាធរត្រូវបានគេជូនដំណឹងអំពីករណីនេះ។

មុននេះ មានការចង្អុលបង្ហាញថា វ៉ាក់សាំងរបស់ក្រុមហ៊ុន Moderna ចំនួន៥៧ប្រអប់ត្រូវបានយកចេញពីទូទឹកកកឱសថនៅឯមជ្ឈមណ្ឌលវេជ្ជសាស្ត្រ Aurora ក្នុងទីក្រុង Grafton រដ្ឋ Wisconsin នាពេលយប់ ក្រោយមកវ៉ាក់សាំងជាង៥០០ដូសត្រូវបានគេបោះចោល។

យោងតាមមជ្ឈមណ្ឌលត្រួតពិនិត្យនិងបង្ការជំងឺបានឲ្យដឹងថា វ៉ាក់សាំងរបស់ក្រុមហ៊ុន Moderna ត្រូវរក្សាទុកក្នុងទូទឹកកកមានសីតុណ្ហភាពចន្លោះ២អង្សាសេទៅ៨អង្សាសេ។

ប៉ូលិសបានបញ្ជាក់ប្រាប់បណ្តាញសារព័ត៌មានថា ពួកគេបានបើកការស៊ើបអង្កេតមួយទាក់ទងនឹងនិយោជិកដែលធ្វើឲ្យខូចដល់វ៉ាក់សាំងហើយ FBI និងរដ្ឋបាលចំណីអាហារនិងឱសថក៏កំពុងតែធ្វើការលើករណីនេះផងដែរ៕

ប្រែសម្រួលដោយ៖ Vann Vann

ប្រភព៖ RT

ចុចអាន៖ ចិនអនុម័តប្រើប្រាស់វ៉ាក់សាំងកូវីដក្រុមហ៊ុន Sinopharm និងផ្ដល់ជូនប្រជាជនដោយឥតគិតថ្លៃ

ចុចអាន៖ មនុស្សម្នាក់ស្លាប់បន្ទាប់ពីចាក់វ៉ាក់សាំងកូវីដ ពេលនេះមានការបកស្រាយ