ទាហាន បេឡារុស និង រុស្ស៊ី ប្រកាសពួតដៃគ្នា (មានវីដេអូ)

ប្រធានាធិបតីបេឡារុស លោក Alexander Lukashenko កាលពីថ្ងៃចន្ទទី១១ខែតុលា បានប្រកាសថា ក្រុមការងារយោធារួមជាមួយរុស្ស៊ី នឹងដាក់ពង្រាយទៅកាន់ព្រំដែនភាគខាងលិចប្រទេស ក្បែរអ៊ុយក្រែន ចំពេលសង្គ្រាមអ៊ុយក្រែន-រុស្ស៊ី កាន់តែក្តៅគគុក។

សារព័ត៌មានបេឡារុស Belta បានរាយការណ៍ថា លោក Lukashenko និងប្រធានាធិបតីរុស្ស៊ីលោក Vladimir Putin បានយល់ព្រមលើការដាក់ពង្រាយកងទ័ព ដែលរួមមានកងកម្លាំងមកពីប្រទេសបេឡារុស និងរុស្ស៊ី។

លោក Lukashenko និយាយថា ក្រុមការងារនោះរួមមានទាហានជាង ១០០០នាក់ ហើយបានចាប់ផ្តើមបង្កើតរួចទៅហើយ។ លោក​ក៏​បាន​និយាយដែរ​ថា ទាហាន​រុស្ស៊ី​រាប់​ពាន់​នាក់​ទៀត​អាច​នឹង​ត្រូវ​ដាក់​ពង្រាយ​នៅ​ក្នុង​ប្រទេស​បេឡារុស នាពេល​ឆាប់ៗ​នេះ។

គួរបញ្ជាក់ជាថ្មី រុស្ស៊ីបានដាក់ពង្រាយទាហានរាប់ម៉ឺននាក់ទៅកាន់ប្រទេសបេឡារុស ជាទីតាំងបើកការលុកលុយអ៊ុយក្រែនក្នុងខែកុម្ភៈ ហើយទាហានរាប់រយនាក់នៅតែឈរជើងនៅទីនោះ ដោយបាញ់មីស៊ីល និងវាយឆ្មក់តាមអាកាស។

ការដាក់ពង្រាយរួមគ្នាថ្មីនេះ ធ្វើឡើងបន្ទាប់ពីរុស្ស៊ី បើកការវាយប្រហារទ្រង់ទ្រាយធំប្រឆាំងនឹងទីក្រុងនានារបស់អ៊ុយក្រែន ដើម្បីជាការសងសឹកចំពោះការផ្ទុះនៅលើស្ពានសំខាន់ ដែលតភ្ជាប់ដីគោករុស្ស៊ីទៅកាន់ឧបទ្វីបគ្រីមៀ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Yahoo

ចុចអាន៖ អាមេរិក ថ្កោលទោសការបាញ់មីស៊ីលរបស់រុស្ស៊ី ខណៈលោក ពូទីន ថា នេះជាការសងសឹកអ៊ុយក្រែន