លោក Stoltenberg៖ ជ័យជម្នះរបស់រុស្ស៊ី គឺជាបរាជ័យរបស់ ណាតូ (មានវីដេអូ)

អគ្គលេខាធិការអង្គការណាតូ លោក Jens Stoltenberg បានប្រាប់អ្នកយកព័ត៌មានកាលពីថ្ងៃអង្គារទី១១ខែតុលាថា ជ័យជម្នះយោធារបស់រុស្ស៊ីនៅអ៊ុយក្រែន ស្មើនឹងបរាជ័យរបស់សម្ព័ន្ធមិត្តលោកខាងលិចទាំងមូល។

យ៉ាងណាក្តី ថ្វីបើណាតូបានផ្តល់ការគាំទ្រដែលមិនធ្លាប់មានពីមុនមកដល់ទីក្រុងកៀវក៏ដោយ ក៏លោក Stoltenberg នៅតែអះអាងថា ប្លុកដែលដឹកនាំដោយសហរដ្ឋអាមេរិកមួយនេះ គឺមិនមែនជាភាគីនៃជម្លោះនោះទេ។

ថ្លែងទៅកាន់អ្នកសារព័ត៌មាន មុនកិច្ចប្រជុំរបស់រដ្ឋមន្ត្រីការពារជាតិណាតូ, លោក Stoltenberg បានប្រកាសថា ការបន្តបញ្ជូនអាវុធទៅកាន់អ៊ុយក្រែន គឺមានសារសំខាន់ដើម្បីធានាថា “អ៊ុយក្រែនឈ្នះក្នុងសមរភូមិ ឈ្នះសង្គ្រាមប្រឆាំងនឹងកងកម្លាំងរុស្ស៊ីដែលលុកលុយ”។

លោក Stoltenberg និយាយថា “ប្រសិនបើប្រធានាធិបតីរុស្ស៊ីលោក វ្ល៉ាឌីមៀរ ពូទីន ឈ្នះមែន, នោះមិនត្រឹមតែជាការបរាជ័យដ៏ធំសម្រាប់ប្រជាជនអ៊ុយក្រែនប៉ុណ្ណោះទេ ប៉ុន្តែវានឹងក្លាយជាបរាជ័យ និងគ្រោះថ្នាក់សម្រាប់យើងទាំងអស់គ្នា”។

អង្គការណាតូ បានផ្តល់ជំនួយយ៉ាងច្រើននៅក្នុងប្រទេសអ៊ុយក្រែន ដោយសមាជិករបស់សម្ព័ន្ធភាពនេះបានផ្តល់ការបណ្តុះបណ្តាល សមត្ថភាពស៊ើបការណ៍សម្ងាត់ និងសព្វាវុធមានតម្លៃរាប់សិបពាន់លានដុល្លារដល់យោធាអ៊ុយក្រែន។

ទោះណាតូ អះអាងម្តងហើយម្តងទៀតថា ខ្លួនមិនមែនជាភាគីនៃជម្លោះនេះក៏ដោយ ប៉ុន្តែទីក្រុងមូស្គូ មើលឃើញខុសពីនេះ។

រដ្ឋមន្ត្រីការបរទេសរុស្ស៊ីលោក Sergey Lavrov បានចោទប្រកាន់អង្គការណាតូថា កំពុងធ្វើសង្គ្រាមប្រូកស៊ីប្រឆាំងនឹងរុស្ស៊ី ខណៈលោក ពូទីន ពណ៌នាថា រុស្ស៊ី កំពុងប្រយុទ្ធជាមួយម៉ាស៊ីនយោធាលោកខាងលិចទាំងមូលនៅអ៊ុយក្រែន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ ក្រុមប្រទេស G7 ប្តេជ្ញាគាំទ្រ អ៊ុយក្រែន រហូតតាមដែលត្រូវការ