បេឡារុស ​បញ្ជា​ឲ្យកងទ័ព​របស់​ខ្លួន ​ធ្វើតេស្ត​សម្រាប់ការ​ត្រៀម​ប្រយុទ្ធ (មានវីដេអូ)

ប្រទេសបេឡារុស បានបញ្ជាឲ្យកងទ័ពរបស់ខ្លួន ធ្វើតេស្តសម្រាប់ការត្រៀមខ្លួនប្រយុទ្ធ ចំពេលមានសេចក្តីរាយការណ៍ថា ទាហានរុស្ស៊ីយ៉ាងច្រើន ត្រូវបានបញ្ជូនចូលប្រទេសនេះ បន្ទាប់ពីមេដឹកនាំ Alexander Lukashenko ប្រកាសថា គាត់នឹងដាក់ពង្រាយ កងកម្លាំងកិច្ចការយោធារួមគ្នា ជាមួយទីក្រុងមូស្គូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការធ្វើតេស្តត្រៀមខ្លួនប្រយុទ្ធ ដែលបញ្ជាដោយលោក Lukashenko ត្រូវបានប្រកាស ខណៈប្រធានសេវាកម្មសម្ងាត់របស់គាត់និយាយថា គាត់រំពឹងថា នឹងឃើញចំណុចរបត់មួយក្នុងការលុកលុយរបស់លោក វ្ល៉ាឌីមៀរ ពូទីន នៅប៉ុន្មានខែខាងមុខនេះ។

ទីភ្នាក់ងារព័ត៌មានបេឡារុស BelTA បានរាយការណ៍កាលពីថ្ងៃអង្គារទី១១ខែតុលាថា ក្រុមប្រឹក្សាសន្តិសុខនៃសាធារណរដ្ឋបេឡារុស បានចាប់ផ្តើមធ្វើតេស្ត កងកម្លាំងប្រដាប់អាវុធនៃប្រទេសបេឡារុស ស្របតាមការណែនាំរបស់ប្រមុខរដ្ឋ។

យោងតាមទីភ្នាក់ងារនេះ, ការធ្វើតេស្តមានលក្ខណៈទូលំទូលាយ និងគ្របដណ្តប់លើបញ្ហាសំខាន់ៗទាក់ទងនឹងការត្រៀមខ្លួនរបស់អង្គភាពកងទ័ព សម្រាប់បំពេញបេសកកម្មរបស់ពួកគេ។ អង្គភាពនានា នឹងអនុវត្តសមយុទ្ធដើរក្បួន សមយុទ្ធដាក់ពង្រាយ និងបេសកកម្មបណ្តុះបណ្តាលការប្រយុទ្ធ។

ការដាក់ពង្រាយនេះ បានបង្កើនភាពភ័យខ្លាចថា ទាហានបេឡារុស អាចចូលរួមជាមួយកងកម្លាំងរុស្ស៊ី ក្នុងបេសកកម្មតស៊ូរបស់ពួកគេដើម្បីដណ្តើមកាន់កាប់ទឹកដី នៅភាគខាងកើតប្រទេសអ៊ុយក្រែន។

ទោះបីជាយ៉ាងណាក៏ដោយ រដ្ឋាភិបាលទីក្រុង មីនស្កិ៍ បាននិយាយកាលពីថ្ងៃអង្គារថា កងកម្លាំងបេឡារុសដែលដាក់ពង្រាយជាមួយកងកម្លាំងរុស្ស៊ី គឺជាក្រុមការពារសុទ្ធសាធ ជាមួយគោលបំណងការពារព្រំដែននៃអតីតសាធារណរដ្ឋសូវៀត ដែលចងសម្ព័ន្ធភាពជិតស្និទ្ធជាមួយរុស្ស៊ី៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ ទាហាន បេឡារុស និង រុស្ស៊ី ប្រកាសពួតដៃគ្នា