ព័ត៌មានអន្ដរជាតិ

ណាតូ គូសបន្ទាត់នុយក្លេអ៊ែរលើ រុស្ស៊ី

បានផុស

២ years មុន

នៅ

ថ្ងៃសុក្រ ១៤ តុលា ២០២២

ដោយ

ប្រមុខអង្គការណាតូលោក Jens Stoltenberg បានព្រមានប្រធានាធិបតីរុស្ស៊ីលោក វ្ល៉ាឌីមៀរ ពូទីន ថា ការបង្កើនជម្លោះដោយប្រើអាវុធនុយក្លេអ៊ែរ នឹងកំពុងឆ្លងកាត់ “ខ្សែបន្ទាត់ដ៏សំខាន់” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Stoltenberg បាននិយាយទៅកាន់អ្នកយកព័ត៌មាននៅទីក្រុងព្រុចសែលកាលពីថ្ងៃព្រហស្បតិ៍ បន្ទាប់ពីកិច្ចប្រជុំរបស់រដ្ឋមន្ត្រីការពារជាតិណាតូថា រុស្ស៊ីដឹងខ្លួនឯងហើយ ប្រសិនបើពួកគេប្រើអាវុធនុយក្លេអ៊ែរប្រឆាំងនឹងអ៊ុយក្រែន វានឹងមានផលវិបាកធ្ងន់ធ្ងរកម្រិតណា ហើយពួកគេក៏ដឹងដែរថា សង្គ្រាមនុយក្លេអ៊ែរមិនអាចឈ្នះបានទេ ហើយក៏មិនគួរធ្វើសង្គ្រាមបែបនេះដែរ ។

ប្រមុខអង្គការណាតូរូបនេះបញ្ជាក់ទៀតថា ទោះយ៉ាងណាប្រទេសជាសមាជិកណាតូនឹងបន្តធ្វើសមយុទ្ធនៅសប្តាហ៍ក្រោយ ពាក់ព័ន្ធនឹងយន្តហោះចម្បាំង ដែលមានសមត្ថភាពអាចផ្ទុកក្បាលគ្រាប់នុយក្លេអ៊ែរ ។ ពួកគេរំពឹងដែរថា កងកម្លាំងនុយក្លេអ៊ែររុស្ស៊ីក៏នឹងធ្វើសមយុទ្ធប្រចាំឆ្នាំរបស់ពួកគេដូចគ្នា នៅពេលណាមួយក្នុងខែនេះ ។

ទន្ទឹមនោះ មន្ត្រីទីភ្នាក់ងារថាមពលបរមាណូអន្តរជាតិ (IAEA) ក៏មានកង្វល់ផងដែរ ពាក់ព័ន្ធនឹងកងកម្លាំងរុស្ស៊ីចូលកាន់កាប់បរិវេណរោងចក្រនុយក្លេអ៊ែរ Zaporizhzhia នៅភាគខាងកើតអ៊ុយក្រែន ហើយចាប់តាំងពីពេលនោះមក រោងចក្រនេះស្ថិតនៅក្រោមការបាញ់ផ្លោង ។

អគ្គនាយក IAEA លោក Rafael Grossi បាននិយាយថា “តំបន់ការពារ” របស់រោងចក្រគឺត្រូវការជាបន្ទាន់ ហើយបានសង្កត់ធ្ងន់ថា រោងចក្រនេះមិនអាចក្លាយជាគោលដៅយោធាប្រភេទណាមួយឡើយ ហើយស្ថានភាពគ្រោះថ្នាក់ណាមួយនៅរោងចក្រនុយក្លេអ៊ែរគឺ “គួរឲ្យបារម្ភខ្លាំងណាស់” ៕