ព័ត៌មានអន្ដរជាតិ

ទឹកទន្លេមេគង្គ កំពុងយាយីយ៉ាងខ្លាំងលើខេត្តមួយចំនួនក្នុងប្រទេសថៃ

បានផុស

២ years មុន

នៅ

ថ្ងៃសៅរ៍ ១៥ តុលា ២០២២

ដោយ

ប្រទេសថៃ ៖ នៅក្នុងសប្ដាហ៍ទីពីរ នៃខែតុលានេះ ទឹកទន្លេមេគង្គ ហក់ឡើងយ៉ាងខ្លាំង បណ្តាលឲ្យលិចលង់ខេត្តមួយចំនួនរបស់ប្រទេសថៃ ដែលស្ថិតនៅជាប់នឹងដងទន្លេនេះ ដោយតំបន់ខ្លះមិនអាចរកទីទួលសុវត្ថិភាព ដើម្បីជ្រកកោនបានឡើយ គឺត្រូវទឹកជំនន់លិចទាំងស្រុងតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្មីៗនេះ គេហទំព័រមួយចំនួនក្នុងប្រទេសថៃ ផ្សាយថា ខេត្តមួយចំនួនស្ថិតតាមបណ្ដោយដងទន្លេមេគង្គ ត្រូវបានទឹកទន្លេជន់លិចយ៉ាងល្ហល្ហេវ ដោយមើលទៅឃើញតែផ្ទៃទឹកសុទ្ធសាធ គ្មានឃើញកោះត្រើយឡើយ ហើយប្រជាពលរដ្ឋក្នុងតំបន់ខ្លះ ត្រូវឡើងទៅរស់នៅលើដំបូលជាបណ្ដោះអាសន្ន ។

កាលពីថ្ងៃទី ១៤ តុលា ក្រុមអាជ្ញាធរ បានប្រើប្រាស់ឧទ្ធម្ភាគចក្រជាច្រើនគ្រឿង ដើម្បីហោះហើរដឹកស្បៀង និងអាហារស្ងួត ទៅទម្លាក់ចែកជូនដល់ពលរដ្ឋដែលរងគ្រោះដោយទឹកជំនន់ មិនអាចធ្វើដំណើរទៅណាបាន។ ទឹកដែលលិចខ្លាំងជាងគេ គឺខេត្តអ៊ូប៊ុនរ៉ាតថានី ស្ថិតនៅជាប់នឹងដងទន្លេមេគង្គ។

តាមប្រភពព័ត៌មានបានបញ្ជាក់ថា រហូតមកទល់ពេលនេះ ពុំមានសញ្ញាណាមួយបង្ហាញថា ទឹកនឹងស្រកវិញនោះឡើយ។ ដោយឡែកប្រជាពលរដ្ឋរស់នៅក្នុងតំបន់នេះ ក៏មិនអាចបម្លាស់ទីទៅរកទីទួលសុវត្ថិភាពណាផ្សេងបានឡើយ ដោយសារទឹកលិចលង់ទាំងស្រុង៕

អត្ថបទ ៖ សោ និយមរ័ត្ន