តៃវ៉ាន់ មិនទទួលយកគោលនយោបាយ “ប្រទេសមួយ ប្រព័ន្ធពីរ” របស់ ចិន

អ្នកនាំពាក្យការិយាល័យប្រធានាធិបតីតៃវ៉ាន់បាននិយាយថា ពលរដ្ឋតៃវ៉ាន់ភាគច្រើនបានបញ្ជាក់យ៉ាងច្បាស់ពីការមិនទទួលយកគោលនយោបាយ “ប្រទេសមួយ ប្រព័ន្ធពីរ” របស់ប្រទេសចិននោះទេ ។

អ្នកនាំពាក្យបានចេញសេចក្តីថ្លែងការណ៍មួយ បន្ទាប់ពីប្រធានាធិបតីចិនលោក ស៊ី ជីនពីង បានសន្យាជាថ្មីដើម្បីសម្រេចបាននូវការបង្រួបបង្រួមកោះតៃវ៉ាន់ នៅក្នុងសុន្ទរកថារបស់លោកនៅឯសមាជជាតិរបស់គណបក្សកុម្មុយនិស្តកាលពីថ្ងៃអាទិត្យ ។

សេចក្តីថ្លែងការណ៍បាននិយាយថា តៃវ៉ាន់នឹងមិនបកក្រោយ ឬបោះបង់ទឹកដី និងអធិបតេយ្យភាពរបស់ខ្លួន ឬធ្វើសម្បទានលើលទ្ធិប្រជាធិបតេយ្យ និងសេរីភាពណាមួយឡើយ ។

សេចក្តីថ្លែងការណ៍បានបន្ថែមទៀតថា ការយល់ឃើញជាទូទៅក្នុងចំណោមប្រជាជនតៃវ៉ាន់គឺថា ការប៉ះទង្គិចដោយប្រដាប់អាវុធនៅលើច្រកសមុទ្រតៃវ៉ាន់ នឹងមិនមែនជាជម្រើសនោះទេ ។

ដោយដកស្រង់សម្តីរបស់ប្រធានាធិបតីលោកស្រី Tsai Ing-wen កាលពីថ្ងៃទី ១០ ខែតុលា, សេចក្តីថ្លែងការណ៍បានបញ្ជាក់ថា តៃវ៉ាន់មានឆន្ទៈក្នុងការធ្វើការជាមួយប្រទេសចិន ដើម្បីស្វែងរកការរៀបចំដែលអាចយល់ស្របគ្នាទៅវិញទៅមក សម្រាប់ការរក្សាសន្តិភាព និងស្ថិរភាពនៅច្រកសមុទ្រតៃវ៉ាន់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក ស៊ី ប្តេជ្ញា​ធ្វើទំនើបកម្មយោធាចិន ឆ្ពោះទៅកាន់ “ស្តង់ដារលំដាប់ពិភពលោក”