ទីក្រុង កៀវ រងការបំផ្ទុះជាថ្មី (មានវីដេអូ)

អភិបាលក្រុងកៀវលោក Vitali Klitschko បាននិយាយនៅលើបណ្ដាញ Telegram ថា មានការផ្ទុះមួយនៅក្នុងសង្កាត់ Shevchenkivskyi កណ្តាលទីក្រុងកៀវនៅព្រឹកថ្ងៃចន្ទនេះ ខណៈក្រោយមកមានការផ្ទុះលើកទី ២ នៅក្នុងសង្កាត់ដូចគ្នានេះ ។

យោងតាមរបាយការណ៍ប្រព័ន្ធផ្សព្វផ្សាយអ៊ុយក្រែនបានឲ្យដឹងថា គិតត្រឹមម៉ោង ៦ និង ១៥ នាទីព្រឹក (ម៉ោងនៅអ៊ុយក្រែន) ការព្រមានអំពីការវាយប្រហារតាមអាកាសបានកើតឡើងនៅក្នុងតំបន់ Zhitomir, Vinnitsa, Cherkasy, Kirovograd, Nikolaev និងតំបន់ Odessa ។

ទន្ទឹមនោះ ការផ្ទុះផ្សេងទៀតក៏ត្រូវបានគេរាយការណ៍ផងដែរនៅក្នុងផ្នែកផ្សេងៗនៃអ៊ុយក្រែនកាលពីយប់ថ្ងៃអាទិត្យ រួមទាំងទីក្រុង Nikolaev និង Odessa ផងដែរ ខណៈនៅទីក្រុង Nikolaev អគ្គិភ័យបានឆាបឆេះនៅកន្លែងស្តុកប្រេងឥន្ធនៈមួយកន្លែង បន្ទាប់ពីការបំផ្ទុះនេះ ។

យោងតាមអាជ្ញាធរក្នុងតំបន់បានឲ្យដឹងថា ទីតាំងហេដ្ឋារចនាសម្ព័ន្ធសំខាន់ៗត្រូវបានកំណត់គោលដៅនៅក្នុងតំបន់ Sumy និង Dnepropetrovsk នៅព្រឹកថ្ងៃចន្ទនេះ ហើយអគ្គីភ័យបានឆាបឆេះនៅទីតាំងហេដ្ឋារចនាសម្ព័ន្ធថាមពលមួយកន្លែងផងដែរក្នុងតំបន់ Dnepropetrovsk ។

គួរបញ្ជាក់ថា ការផ្ទុះនេះបានកើតឡើងត្រឹមតែរយៈពេល ១សប្តាហ៍ប៉ុណ្ណោះ បន្ទាប់ពីទីក្រុងកៀវត្រូវបានវាយប្រហារដោយមីស៊ីលរបស់រុស្ស៊ីជាច្រើនគ្រាប់ដែលបណ្តាលឲ្យមនុស្ស ១៩ នាក់ស្លាប់ និងជាច្រើននាក់រងរបួស ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក Zelensky ឲ្យប្រជាជន អ៊ុយក្រែន កាត់បន្ថយការប្រើប្រាស់អគ្គិសនី នៅពេលយប់