កូរ៉េខាងជើង បាញ់កាំភ្លើងធំ រាប់រយគ្រាប់ ព្រមាន កូរ៉េខាងត្បូង (មានវីដេអូ)

យោងតាមយោធាកូរ៉េខាងត្បូងបានឲ្យដឹងថា កូរ៉េខាងជើង បានបាញ់កាំភ្លើងធំប្រហែល ២៥០គ្រាប់ ចេញពីតំបន់ឆ្នេរខាងកើត និងខាងលិចកាលពីយប់ថ្ងៃអង្គារ នៅក្នុងអ្វីដែលកងទ័ពកូរ៉េខាងជើងហៅថាជា “ការបាញ់ព្រមាន” ប្រឆាំងនឹងសមយុទ្ធកូរ៉េខាងត្បូង ដែលកំពុងបន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គសេនាធិការចម្រុះរបស់ទីក្រុងសេអ៊ូល (JCS) បាននិយាយថា កូរ៉េខាងជើងបានបាញ់កាំភ្លើងធំ ចូលទៅក្នុងតំបន់ទ្រនាប់អន្តរកូរ៉េដែលនេះជាការរំលោភយ៉ាងច្បាស់លើកិច្ចព្រមព្រៀងយោធាគ្រប់ជ្រុងជ្រោយ (CMA) របស់ភាគីទាំងពីរ ដោយក្រោមកិច្ចព្រមព្រៀងនេះ ពួកគេបានឯកភាពគ្នាមិនធ្វើសមយុទ្ធយោធានៅជិតព្រំដែនឡើយ។ .

JCS បាននិយាយនៅព្រឹកថ្ងៃពុធទី១៩ខែតុលានេះថា “កងទ័ពកូរ៉េខាងត្បូង បានមើលឃើញគ្រាប់កាំភ្លើងធំប្រហែល១០០គ្រាប់ ដែលបានបាញ់ចូលទៅក្នុងសមុទ្រខាងលិច ចេញពីតំបន់ Jangsan-got នៃខេត្ត Hwanghae របស់ប្រទេសកូរ៉េខាងជើង ចាប់ពីម៉ោង១០យប់ថ្ងៃអង្គារ និងគ្រាប់កាំភ្លើងធំប្រហែល ១៥០ គ្រាប់បាញ់ចូលទៅក្នុងសមុទ្រខាងកើត ចេញពីតំបន់ Changjon នៃខេត្ត Kangwon ចាប់ពីម៉ោងប្រហែល ១១ យប់មក”។

JCS បន្តថា “ការបង្កហេតុជាបន្តពីសំណាក់កូរ៉េខាងជើង ធ្វើឲ្យប៉ះពាល់ដល់សន្តិភាព និងស្ថិរភាពនៃឧបទ្វីបកូរ៉េ ក៏ដូចជាសហគមន៍អន្តរជាតិ។ យើងសូម​ព្រមាន​យ៉ាង​ម៉ឺងម៉ាត់ និង​ជំរុញ​ឲ្យ​កូរ៉េខាងជើង​បញ្ឈប់​រឿងនេះ​ជាបន្ទាន់​”។

សមយុទ្ធកាំភ្លើងធំរបស់កូរ៉េខាងជើងកាលពីយប់ថ្ងៃអង្គារ បានកើតឡើងបន្ទាប់ពីខ្លួនបាញ់កាំភ្លើងធំចូលទៅក្នុងតំបន់ទ្រនាប់ភាគខាងជើងនៃខ្សែបន្ទាត់ NLL កាលពីថ្ងៃទី១៤ខែតុលា ដែលទីក្រុងសេអ៊ូលក៏បានហៅផងដែរថា ជាការរំលោភលើកិច្ចព្រមព្រៀងអន្តរកូរ៉េឆ្នាំ២០១៨៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ NK News

ចុចអាន៖ កូរ៉េ ខាង ជើង បាញ់មីស៊ីលរយៈចម្ងាយឆ្ងាយ ដែល អាច ផ្ទុក អាវុធ នុយក្លេអ៊ែរ