ផ្ទុះគ្រាប់បែកក្នុងពន្ធនាគារនៅ មីយ៉ាន់ម៉ា ស្លាប់មនុស្ស ៨ នាក់

យ៉ាងហោចណាស់មនុស្ស ៨ នាក់បានស្លាប់ក្នុងហេតុការបំផ្ទុះគ្រាប់បែកនៅក្នុងពន្ធនាគារ Insein ដែលមានសន្តិសុខតឹងរ៉ឹងបំផុតរបស់ប្រទេសមីយ៉ាន់ម៉ា ។

យោងតាមសារព័ត៌មាន BBC បានរាយការណ៍ថា គ្រាប់បែកចំនួន ២ គ្រាប់បានផ្ទុះឡើងនៅច្រកចូលរបស់ពន្ធនាគារនៅថ្ងៃពុធនេះ ដោយបានសម្លាប់បុគ្គលិកពន្ធនាគារចំនួន ៣ នាក់ និងអ្នកចូលសួរសុខទុក្ខចំនួន ៥ នាក់ សរុប ៨ នាក់ ។

ដោយឡែកសារព័ត៌មានក្នុងស្រុក Myanmar Now និង Khit Thit Media ក៏បានរាយការណ៍ដែរថា ក្រៅពីអ្នកស្លាប់ ក្នុងនោះក៏មានមនុស្ស ១៥ នាក់រងរបួសផងដែរ ខណៈរហូតមកដល់ពេលនេះមិន​ទាន់​មាន​ក្រុម​ណាមួយ​ចេញ​មុខ​ទទួល​ខុស​ត្រូវចំពោះហេតុការណ៍បំផ្ទុះនេះ​នៅ​ឡើយ​ទេ ។

គួរបញ្ជាក់ថា ពន្ធនាគារ Insein គឺជាពន្ធនាគារធំបំផុតរបស់ប្រទេសមីយ៉ាន់ម៉ាដែលមានអ្នកទោសប្រហែល ១០,០០០ នាក់ ដែលភាគច្រើនជាអ្នកទោសនយោបាយ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ ផ្ទុះគ្រាប់បែកនៅជិតព្រំដែន ថៃ-មីយ៉ាន់ម៉ា