រលកកម្តៅ អាចនាំមេរោគនៅតំបន់អាក់ទិក មកចម្លងរីករាលដាល ដល់មនុស្សជាតិ

អាកាសធាតុក្តៅ អាចនាំមេរោគនៅតំបន់អាក់ទិក ឲ្យចូលទៅក្នុងទំនាក់ទំនងជាមួយបរិស្ថាន និងសត្វ ដែលជាហេតុបង្កើនហានិភ័យនៃការរីករាលដាលវីរុស។ នេះបើយោងតាមការស្រាវជ្រាវដែលបានចេញផ្សាយ នាពេលថ្មីៗ។

មេរោគ ត្រូវការភ្នាក់ងារដូចជាមនុស្ស សត្វ រុក្ខជាតិ ឬផ្សិត ដើម្បីចម្លងនិងរីករាលដាល ហើយជួនកាល ពួកវាអាចចូលទៅក្នុងមេរោគថ្មីដែលខ្វះភាពស៊ាំ ដូចដែលយើងបានឃើញជាមួយនឹងជំងឺរាតត្បាត កូវីដ១៩។

អ្នកវិទ្យាសាស្រ្តក្នុងប្រទេសកាណាដា បានវិភាគហ្សែនដីរឹង និងដីល្បាប់ពីបឹង Hazen ដែលជាបឹងទឹកសាបអាក់ទិក ធំជាងគេបំផុតលើពិភពលោក ហើយបង្ហាញថា ហានិភ័យនៃការសាយភាយមេរោគ អាចមានកាន់តែខ្ពស់នៅជិតផ្ទាំងទឹកកកដែលរលាយ។

ការរកឃើញនេះបញ្ជាក់ថា នៅពេលដែលសីតុណ្ហភាពសកលកើនឡើងដោយសារតែបម្រែបម្រួលអាកាសធាតុ វាកាន់តែទំនងថា មេរោគ និងបាក់តេរីដែលជាប់នៅក្នុងផ្ទាំងទឹកកក និង កំណក អាចភ្ញាក់ឡើងវិញ ហើយឆ្លងដល់សត្វព្រៃ។ បន្ទាប់មកទៀត វីរុសទាំងនោះ អាចបំប្លែងខ្លួន និងមានសមត្ថភាពចម្លងពីសត្វទៅមនុស្ស។

ឧទាហរណ៍ ក្នុងឆ្នាំ២០១៦ ការផ្ទុះឡើងនៃមេរោគ Anthrax នៅភាគខាងជើងតំបន់ស៊ីបេរី ដែលបានសម្លាប់កុមារម្នាក់ និងឆ្លងមនុស្ស៧នាក់ផ្សេងទៀត ត្រូវបានគេសន្មតថា ដើមហេតុមកពីរលកកម្តៅដែលបានរលាយកំណក រួចធ្វើឲ្យគ្រោងឆ្អឹងសត្វរមាំងដែលមានមេរោគ ផុសចេញមក៕

ប្រែសម្រួល៖ Vann Vann

ប្រភព៖ Aljazeera, Guardian

ចុចអាន៖ គួរដឹងអំពី SIDS ឬ អាការ ធ្វើឲ្យទារក បាត់បង់ជីវិតភ្លាមៗដោយគ្មានមូលហេតុ