រដ្ឋមន្ត្រីការបរទេសអាស៊ាន រៀបចំកិច្ចប្រជុំបន្ទាន់ ស្តីពីវិបត្តិ មីយ៉ាន់ម៉ា

រដ្ឋមន្ត្រីការបរទេសអាស៊ីអាគ្នេយ៍ បានជួបប្រជុំគ្នាក្នុងទីក្រុងហ្សាការតា នៅថ្ងៃព្រហស្បតិ៍ទី២៧ខែតុលានេះ ដើម្បីពិភាក្សាអំពីវិបត្តិនយោបាយនៅក្នុងប្រទេសមីយ៉ាន់ម៉ា មុនកិច្ចប្រជុំកំពូលអាស៊ានខែវិច្ឆិកា។

ទោះបីជាយ៉ាងណាក៏ដោយ កិច្ចប្រជុំបន្ទាន់ក្នុងប្រទេសឥណ្ឌូណេស៊ីនេះ គ្មានតំណាងមកពីប្រទេសមីយ៉ាន់ម៉ា ចូលរួមនោះទេ។

សមាគមប្រជាជាតិអាស៊ីអាគ្នេយ៍ (អាស៊ាន) បាននិយាយថា ខ្លួនព្រួយបារម្ភយ៉ាងខ្លាំងចំពោះការកើនឡើងនៃករណីរំលោភបំពានសិទ្ធិមនុស្សនៅទីនោះ ប៉ុន្តែកិច្ចខិតខំប្រឹងប្រែងរបស់ខ្លួនក្នុងការដោះស្រាយវិបត្តិនេះ មិនទាន់ទទួលបានផ្លែផ្កានៅឡើយទេ។

រដ្ឋមន្ត្រីការបរទេសឥណ្ឌូណេស៊ី លោកស្រី Retno Marsudi បាននិយាយថា ផែនការសន្តិភាពកង់សង់ស៊ីស ៥ចំណុចរបស់អាស៊ាន ចាប់ពីខែមេសាឆ្នាំមុនមក នឹងក្លាយជារឿងមួយដែលត្រូវផ្តោតសំខាន់ ក្នុងកិច្ចពិភាក្សាបន្ទាន់ថ្ងៃព្រហស្បតិ៍នេះ នៅឯលេខាធិការដ្ឋានអាស៊ានក្នុងទីក្រុងហ្សាការតា។

អ្នក​នាំ​ពាក្យ​ក្រសួង​ការ​បរទេស​បាន​និយាយ​ថា លោកស្រី Marsudi នឹង​ផ្តល់​ព័ត៌មាន​សង្ខេប​អំពី​កិច្ច​ពិភាក្សា​នេះ នៅ​ពេល​រសៀល។

គួរបញ្ជាក់ថា ប្រទេសមីយ៉ាន់ម៉ា បានស្ថិតក្នុងភាពចលាចលចាប់តាំងពីរដ្ឋប្រហារខែកុម្ភៈឆ្នាំមុនមក ដោយមនុស្ស២៣០០នាក់ ត្រូវបានសម្លាប់នៅក្នុងការបង្រ្កាបដ៏ឃោរឃៅរបស់យោធា។ នេះបើយោងតាមរបាយការណ៍របស់ក្រុមឃ្លាំមើលក្នុងស្រុក៕

ប្រែសម្រួល៖ Vann Vann

ប្រភព៖ AFP

ចុចអាន៖ យោធា មី យ៉ាន់ ម៉ា ប្រតិកម្មខ្លាំងៗលើ អាស៊ាន បន្ទាប់ ពី ត្រូវ រារាំង មិនឲ្យ ប្រជុំ