រុស្ស៊ី ថា ចប់ហើយ ចំពោះការកែនទ័ពបម្រុងចំនួន ៣០ ម៉ឺននាក់

រដ្ឋមន្ត្រីការពារជាតិរុស្ស៊ីលោក Sergey Shoigu បាននិយាយកាលពីថ្ងៃសុក្រថា រុស្ស៊ីបានបញ្ចប់ការកែនទ័ពបម្រុងមួយផ្នែកក្នុងប្រទេសសម្រាប់ប្រតិបត្តិយោធានៅអ៊ុយក្រែនចំនួន ៣០ ម៉ឺននាក់ហើយ ។

លោក Shoygu បានជូនដំណឹងដល់ប្រធានាធិបតី Vladimir Putin នៅក្នុងកិច្ចប្រជុំមួយនៅទីក្រុងមូស្គូថា អ្នកជ្រើសរើសត្រូវបានចុះឈ្មោះ ស្របតាមបទបញ្ជារបស់ប្រធានាធិបតី ។

លោកបាននិយាយថា “ភារកិច្ចនៃការកែនទ័ពចំនួន ៣0 ម៉ឺននាក់ត្រូវបានបញ្ចប់ហើយហើយមិនមានកិច្ចការបន្ថែមត្រូវបានគ្រោងទុកនោះទេ ។ ទាហាន ៨២,០០០ នាក់ត្រូវបានបញ្ជូនទៅកាន់តំបន់ជម្លោះក្នុងប្រទេសអ៊ុយក្រែន ប៉ុន្តែពួកគេពាក់កណ្តាលកំពុងបន្តការហ្វឹកហ្វឺន ខណៈដែល ៤១,០០០ ផ្សេងទៀត គឺផ្ដល់ឲ្យអង្គភាពប្រយុទ្ធ ។

ទោះយ៉ាងណាលោក Shoygu ក៏បានទទួលស្គាល់បញ្ហាក្នុងការកែនកាលពីដំបូងផងដែរ ប៉ុន្តែក្រោយមករដ្ឋាភិបាលរុស្ស៊ីបានដោះស្រាយបញ្ហានេះដោយជោគជ័យវិញ ។

ស្របពេលជាមួយគ្នានេះ លោក Putin បានស្នើឲ្យលោក Shoygu វិភាគចំណុចខ្សោយទាំងអស់របស់កងទ័ពនៅក្នុងដំណើរការហ្វឹកហ្វឺន ហើយត្រូវធ្វើការកែតម្រូវចាំបាច់ភ្លាមៗ ។

គួរបញ្ជាក់ថា លោក Putin បានប្រកាសកែនទ័ពរហូតដល់ ៣០ ម៉ឺននាក់ដែលមានអាយុចន្លោះពី ១៨ ទៅ ៥០ ឆ្នាកាលពីថ្ងៃទី ២១ ខែកញ្ញាដើម្បីជួយក្នុងប្រតិបត្តិការយោធាពិសេសរបស់ទីក្រុងមូស្គូនៅអ៊ុយក្រែនដែលបានចាប់ផ្តើមនៅក្នុងខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ រុស្ស៊ី ប្រាប់មូលហេតុដែល អាមេរិក និងអង្គការណាតូ ក្លាយជាភាគីជម្លោះនៅ អ៊ុយក្រែន