រុស្សី សាកល្បងនាវាមុជទឹកនុយក្លេអ៊ែរថ្មីបំផុត ចំពេលតានតឹងជាមួយ លោកខាងលិច (មានវីដេអូ)

ប្រទេសរុស្ស៊ី បានធ្វើការសាកល្បងនាវាមុជទឹកដើរដោយថាមពលនុយក្លេអ៊ែរយុទ្ធសាស្ត្រថ្មីមួយគ្រឿង ចំពេលមានភាពតានតឹងកាន់តែខ្លាំងជាមួយលោកខាងលិច។ នេះបើតាមការបញ្ជាក់ពីមេបញ្ជាការកងទ័ពជើងទឹករុស្ស៊ី កាលពីថ្ងៃអាទិត្យទី៣០ខែតុលា។

ឧត្តមនាវីឯក Nikolay Yevmenov បាននិយាយក្នុងឱកាសខួបលើកទី៣២៦ នៃការបង្កើតកងនាវាចររុស្ស៊ីថា “នាវាមុជទឹកយុទ្ធសាស្ត្រ ដើរដោយថាមពលនុយក្លេអ៊ែរថ្មីបំផុតឈ្មោះ Generalissimo Suvorov កំពុងត្រូវបានសាកល្បង”។

ប្រមុខកងទ័ពជើងទឹករូបនេះបាននិយាយថា នាវាមុជទឹកនេះ ត្រូវបានសាងសង់នៅឯសហគ្រាស Sevmash ដែលជាកន្លែងផលិតកប៉ាល់ដ៏ធំបំផុតរបស់រុស្ស៊ីក្នុងទីក្រុង Severodvinsk ភាគខាងជើង។

Generalissimo Suvorov គឺជានាវាទីប្រាំមួយ ក្នុងកងនាវាមុជទឹកមីស៊ីលផ្លោងជំនាន់ទី៤របស់រុស្ស៊ី និងជានាវាធំលំដាប់ទី២ក្នុងថ្នាក់ Borei-A ដែលត្រូវបានធ្វើឲ្យប្រសើរឡើង។ នាវាថ្នាក់ Borei-A នីមួយៗ អាចផ្ទុកមីស៊ីលផ្លោងដល់ទៅ ១៦គ្រាប់ដែលអាចបំពាក់ក្បាលគ្រាប់នុយក្លេអ៊ែរ។

នាវា​នេះ​ត្រូវ​បាន​​ដាក់​ឈ្មោះ​តាម​ឧត្តមសេនីយ៍ Alexander Suvorov នៅ​សតវត្សរ៍​ទី១៨ ដែល​ត្រូវ​បាន​គេ​ចាត់​ទុក​ថា​ជា​មេទ័ព​ដ៏​អស្ចារ្យ​បំផុត​ក្នុង​ប្រវត្តិសាស្ត្រ​រុស្ស៊ី។

កាលពីដើមសប្តាហ៍នេះ ប្រធានាធិបតីរុស្ស៊ី លោក វ្ល៉ាឌីមៀរ ពូទីន ផ្ទាល់ បានមើលការខុសត្រូវលើសមយុទ្ធនុយក្លេអ៊ែរ ដែលពាក់ព័ន្ធនឹងកងកម្លាំងជើងគោក សមុទ្រ និងយន្តហោះរបស់ទីក្រុងមូស្គូ។

សកម្មភាព​យោធា​នេះ កើតឡើង​ស្របទៅ​នឹង​សមយុទ្ធ​ស្រដៀង​គ្នា​ ​របស់​អង្គការណាតូ ​ដែល​មាន​ឈ្មោះ​ថា “Steadfast Noon”។ ទោះបីជាមានភាពតានតឹងខ្លាំងរវាងរុស្ស៊ី និងលោកខាងលិចក៏ដោយ ប៉ុន្តែអង្គការណាតូបានហៅសមយុទ្ធនេះថាជា “ទម្លាប់” និង “មិនជាប់ពាក់ព័ន្ធទៅនឹងព្រឹត្តិការណ៍ពិភពលោកបច្ចុប្បន្នណាមួយឡើយ”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី ធ្វើសមយុទ្ធវាយប្រហារនុយក្លេអ៊ែរសងសឹក ដោយលោក ពូទីន ត្រួតពិនិត្យផ្ទាល់