មេ ណាតូ ពន្យល់មូលហេតុដែលមិនអាចឲ្យ រុស្ស៊ី ឈ្នះជម្លោះនៅ អ៊ុយក្រែន

អគ្គលេខាធិការអង្គការណាតូលោក Jens Stoltenberg បាននិយាយថា យើងមិនអាចបណ្ដោយឲ្យរុស្ស៊ីទទួលបានជ័យជម្នះនៅក្នុងជម្លោះជាមួយអ៊ុយក្រែននោះទេ ព្រោះថា ជ័យជម្នះរបស់រុស្ស៊ីលើរដ្ឋាភិបាលទីក្រុងកៀវ នឹងបង្កើនអំណាចកាន់តែខ្លាំងឡើងដល់ប្រទេសចិន ។

លោក Stoltenberg បាននិយាយនៅក្នុងបទសម្ភាសន៍ជាមួយសារព័ត៌មាន Politico ថា ការទទួលបានជ័យជម្នះរបស់រុស្ស៊ី នឹងជារឿងអាក្រក់សម្រាប់យើងទាំងអស់គ្នានៅអឺរ៉ុប និងអាមេរិកខាងជើង ជាពិសេសនៅក្នុងអង្គការណាតូទាំងមូលតែម្ដង ។

លោកអគ្គលេខាធិការបញ្ជាក់ទៀតថា “ប្រសិនបើរុស្ស៊ីឈ្នះសង្គ្រាមលុកលុយលើអ៊ុយក្រែនមែននោះ វា​នឹង​ផ្ញើ​សារ​ទៅ​កាន់​មេដឹកនាំ​ផ្តាច់ការ មិន​ត្រឹម​តែ​លោក ​ពូទីន ​ប៉ុណ្ណោះ​ទេ ប៉ុន្តែ​ថែមទាំង​ចិនផង​ដែរ ដែល​អាចប្រើ​កម្លាំង​យោធា​ដើម្បីសម្រេចបាននូវគោលដៅណាមួយរបស់ពួកគេ” ។

លោកបានចង្អុលបង្ហាញថា “វាមានសារៈសំខាន់សម្រាប់សម្ព័ន្ធមិត្តណាតូក្នុងការឈររួមគ្នា និងដើម្បីដោះស្រាយផលវិបាកណាមួយដែលកើតឡើងចេញពីប្រទេសចិន ជាពិសេសការលើកឡើងនាពេលថ្មីៗនេះពីសំណាក់លោកប្រធានាធាធិបតីអាមេរិកលោក ចូ បៃដិន” ។

នៅក្នុងផែនការយុទ្ធសាស្ត្រការពារជាតិដែលទើបបញ្ចេញ រដ្ឋបាលរបស់លោក ចូ បៃដិន និយាយថា ប្រទេសចិននៅតែជាការគំរាមកំហែងសន្តិសុខដ៏គ្រោះថ្នាក់បំផុតចំពោះសហរដ្ឋអាមេរិក ព្រោះចិនជាប្រទេសដ៏មានឥទ្ធិពល ដែលអាចប្រកួតប្រជែងជាមួយសហរដ្ឋអាមេរិកជាប្រព័ន្ធ លើផ្នែកយោធា សេដ្ឋកិច្ច បច្ចេកវិទ្យា និងការទូតជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Politico

ចុចអាន ៖ រុស្ស៊ី ប្រាប់មូលហេតុដែល អាមេរិក និងអង្គការណាតូ ក្លាយជាភាគីជម្លោះនៅ អ៊ុយក្រែន